Tuesday, July 26, 2016

တိုင်းရင်းသား လက်နက်ကိုင်အဖွဲ့များအကြား အပစ်ရပ် ၊ မရပ်ဆိုပြီး ကန့်သတ်မှုမရှိဘဲ စည်းလုံးညီညွတ်စွာဖြင့် အဖြေရှာရန် ကေအိုင်အို ဒုတိယ ဥက္ကဋ္ဌ ဗိုလ်ချုပ်ကြီးအင်ဘန်လ တိုက်တွန်း

တိုင်းရင်းသား လက်နက်ကိုင်အဖွဲ့များအကြား အပစ်ရပ် ၊ မရပ်ဆိုပြီး ကန့်သတ်မှုမရှိဘဲ စည်းလုံးညီညွတ်စွာဖြင့် အဖြေရှာရန် ကေအိုင်အို ဒုတိယ ဥက္ကဋ္ဌ ဗိုလ်ချုပ်ကြီးအင်ဘန်လ တိုက်တွန်း
 
Tuesday, July 26, 2016
--- --- --- --- ---

တိုင်းရင်းသားလက်နက်ကိုင်ကိုင်အဖွဲ့များအကြား အပစ်ခတ်ရပ်စဲထားသည့် အဖွဲ့ ၊ မရပ်ထားသည့်အဖွဲ့ဆိုသည့် ကန့်သတ်ချက်များမှာ မရှိသင့်ဘဲ နိုင်ငံရေးပြသ၁နာကို အဖြေရှာရာတွင် အားလုံး စုစည်းညီညွတ်စွာဖြင့် အဖြေရှာကြရန် ကေအိုင်အို ကချင်လွတ်မြောက်ရေးအဖွဲ့ ဒုတိယ ဥက္ကဋ္ဌဗိုလ်ချုပ်ကြီး အင်ဘန်လက တိုက်တွန်းလိုက်သည်။
‘ အပစ်ရပ်အဖွဲ့နဲ့ အပစ်မရပ်ဆိုတဲ့ ကန့်သတ်ချက်တွေဟာ တိုင်းရင်းသားတွေအကြားမှာ မရှိသင့်ပါဘူး။ နိုင်ငံရေးပြသ၁နာကို နိုင်ငံရေးနည်းလမ်းနဲ့ ဆွေးနွေး အဖြေရှာသွားရမယ့်တိုက်ပွဲမှာ တိုင်းရင်းသားတွေအကြား စုစည်းညီညွတ်မှုကို အခြေခံပြီး တိုက်ပွဲဝင်သွားဖို့ တိုက်တွန်းပါတယ် ‘ ဟု ဗိုလ်ချုပ်ကြီးအင်ဘန်လက ယနေ့စတင်ကျင်းပသည့် မိုင်ဂျာယန် တိုင်းရင်းသားမျက်နှာစုံညီအစည်းဝေးတွင် တိုက်တွန်းပြောဆိုသည်။
ယနေ့စတင်ကျင်းပသော တိုင်ရင်းသား လက်နက်ကိုင်အဖွဲ့ ၁၇ ဖွဲ့ နှင့် တိုင်းရင်းသားနိုင်ငံရေးပါတီများမှ ကိုယ်စားလှယ်များ အရပ်ဘက်အဖွဲ့အစည်းများ တက်ရောက်သည့် မိုင်ဂျာယန် အစည်းဝေးတွင် ပင်လုံ လက်စွဲစာတမ်း ဆွေးနွေးအတည်ပြုခြင်း ၊ ဖက်ဒရာယ် ဒီမိုကရေစီ ပြည်ထောင်စု တည်ထောင်ခြင်းဆိုင်ရာ ဖွဲ့စည်းပုံ အခြေခံဥပဒေများအတွက် အခြေခံမူများ ၊ လုံခြုံရေးနှင့် ကာကွယ်ရေးဆိုင်ရာအခြေခံမူနှင့် နိုင်ငံရေးဆွေးနွေးပွဲမူဘောင် ပြန်လည်ပြင်ဆင်မှုတို့ကို ဆွေးနွေးမည်ဖြစ်ကြောင်း အစည်းဝေး ကျင်းပရေးကော်မတီ ဥက္ကဋ္ဌ ခူးလ်ဦးရယ်က ပြောသည်။
‘အစိုးရက ၂၁ ပင်လုံညီလာခံဆိုပြီး နိုင်ငံရေး ပြသ၁နာကို ဖြေရှင်းဖို့ ဆွေးနွေးဖို့ရှိနေတယ်။ တိုင်းရင်းသားတွေဘက်က ဖက်ဒရယ်ပြည်ထောင်စုကို ပုံဖော်သွားနိုင်ဖို့အတွက် ဘုံသဘောထားတွေ သဘောတူညီစွာ ချမှတ်သွားနိုင်ဖို့ အရေးကြီးတယ်။ ချမှတ်သွားနိုင်လို့လည်း ယုံကြည်တယ်။ ဆွေးနွေးပွဲတစ်လျှောက်မှာ အဖွဲ့အစည်းတစ်ခုနဲ့ တစ်ခုအကြား သံသယနဲ့ အမုန်းတရားပွားများစေပြီး ယုံကြည်မှုနဲ့ စုစည်းညီညွတ်မှု ကျဆင်းစေတဲ့ အကြောင်းအရာတွေကို ရှောင်ရှားကြဖို့လည်း နိုးဆော်လိုတယ်‘ ဟု ကေအိုင်အို ကချင်လွတ်မြောက်ရေးအဖွဲ့၏ ဒုတိယ ဥက္ကဋ္ဌဖြစ်သူက တိုက်တွန်းပြောဆိုသည်။

ဗိုလ်ချုပ်ကြီးအင်ဘန်လအနေဖြင့် တိုင်းရင်းသားတပ်ပေါင်းစု UNFC ကို ဦးဆောင်ကာ နိုင်ငံတော်၏ အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည်နှင့် ဇူလိုင်လ ၁၇ ရက်နေ့က တွေ့ဆုံခဲ့ကာ ၁၉၄၇ ခုနစ်က ဗိုလ်ချုပ်အောင်ဆန်းနှင့် တိုင်းရင်းသားများ သဘောတူညီခဲ့သည့် နိုင်ငံရေးပဋိဥာဉ်အား ၂၁ ပင်လုံသို့ ဆက်လက်သယ်ဆောင်ကာ ပြည်တွင်းစစ်ချုပ်ငြိမ်းရေးနှင့် ဖက်ဒရယ် ဒီမိုကရေစီပြည်ထောင်စု တည်ထောင်ရေးအတွက် အဖြေရှာမည့် နိုင်ငံရေးဆွေးနွေးပွဲဖြစ်လာရေး အကောင်ထည်ဖော်ပေးရန် တိုက်တွန်းခဲ့ကြောင်း မိုင်ဂျာယန် အစည်းဝေးအဖွင့် မိန့်ခွန်းပြောဆိုရာတွင်လည်း ပြောဆိုသည်။
‘ ၁၉၄၇ ခုနစ်က ပင်လုံစာချုပ်ကို အခြေခံပြီးရှိလာတဲ့ စုစည်းမှုတွေကို တွန်းအားအဖြစ် အခြေခံပြီးတော့ ဆွေးနွေးရင် လာမယ့်၂၁ ရာစု ပင်လုံညီလာခံဟာ အောင်မြင်မယ့်အလားအလာရှိပါတယ်။ အရေးကြီးတာကတော့ စုစည်းညီညွတ်မှုပါပဲ ‘ ဟု မိုင်ဂျာယန် တိုင်းရင်းသား လက်နက်ကိုင်အဖွဲ့များ မျက်နှာစုံညီအစည်းဝေးသို့ တက်ရောက်လာသည့် ကုလသမဂ္ဂ အထွေထွေအတွင်းရေးမှူးချုပ်၏ မြန်မာနိုင်ငံဆိုင်ရာ အထူးကိုယ်စားလှယ် မစ္စတာ နမ်ဗီးယားက ပြောသည်။
ဆွေးနွေးပွဲကျင်းပရေးကော်မတီ ဥက္ကဋ္ဌနှင့် ကရင်နီအမျိုးသားတိုးတက်ရေးပါတီ KNPP ၏ ဒုတိယ ဥက္ကဋ္ဌဖြစ်သူ ခူးလ်ဦးရာယ်က ‘အစည်းဝေးကို ၂၁ ပင်လုံအကြို ညှိနိုင်းရေးနဲ့ အနာဂတ် ဖက်ဒရာယ် ဒီမိုကရေစီ ပြည်ထောင်စု တည်ဆောက်ရေးအတွက် နိုင်ငံရေးဘုံသဘောထားရယူရေးတို့အတွက် ကျင်းပရတာဖြစ်တယ်။ အစည်းဝေးတက်ရောက်လာတဲ့ ဆိုင်ရာ အဖွဲ့အစည်းတွေကို ကိုယ်စားလှယ်တွေအနေနဲ့ အလေးအနက်ထားပြီး စိတ်ရှည်သည်းခံမှုနဲ့ မေတ္တာ စေတာရှေ့ထားပြီး အပြန်အလှန်ညှိနှိုင်းတိုင်ပင်စွာနဲ့ တင်ပြဆွေးနွေးဖို့ မေတ္တာရပ်ခံပါတယ် ‘ ဟု အစည်းဝေးတက်ရောက်လာသူများကို တိုက်တွန်းသည်။
လက်ရှိအချိန်အထိ အစိုးရနှင့် နိုင်ငံလုံးဆိုင်ရာ အပစ်ခတ်ရပ်စဲထားသည့် တိုင်းရင်းသားလက်နက်ကိုင်အဖွဲ့ ၈ ဖွဲ့ရှိပြီး ၁၃ ဖွဲ့မှာ လက်မှတ်ရေးထိုးထားခြင်း မရှိသေးကြောင်း သိရသည်။
စိုင်းထွန်းအောင်လွင်
The Ladies News
Photo- ရွှေအင်းသား ခင်မောင်ဝင်း

No comments: