Sunday, July 31, 2016

ဒေါ်အောင်ဆန်းစုကြည် ဘယ်လိုကစားမလဲ

ဒေါ်အောင်ဆန်းစုကြည် ဘယ်လိုကစားမလဲ
30-Jul-2016 tagged as အောင်ဆန်းစုကြည် အမေရိကန် တရုတ် အင်အားကြီး
 
ဒေါ်အောင်ဆန်းစုကြည် အာဏာ တည်ဆောက်နိုင်ပါ့မလား ဟူသော မေးခွန်းကို အောင်အောင်မြင်မြင် ဖြေပြီးစ အာဏာရအပြီး ရက် ၁၂၀ အကြာတွင် ဒေါ်အောင်ဆန်းစုကြည်ကို နောက်ထပ် မေးခွန်းကြီးတစ်ခုက စောင့်မျှော်နေသည်။ အမေရိကန်ပြည်ထောင်စုနှင့် တရုတ် (ဝါ) လင်းယုန်နှင့် နဂါးကို ဒေါ်အောင်ဆန်းစုကြည် ဘယ်လိုကစားမလဲ ဟူသောမေးခွန်း။ စင်စစ်ထိုမေးခွန်းက ဒေါ်အောင်ဆန်းစုကြည် မတက်မီ ကတည်းက ရှိနေခဲ့သည့်မေးခွန်း။ ထိုမေးခွန်း၏ ကျောချင်းကပ် မေးခွန်းက ‘ဒေါ်အောင်ဆန်းစုကြည်ကို လင်းယုန်နှင့် နဂါးကဘယ်လိုကစားမလဲ’။
စင်စစ် နိုင်ငံကြီးများနှင့် နိုင်ငံငယ်များ နိုင်ငံတကာရေး ကွင်းပြင်ကြီးထဲတွင် သူ့အကျိုးကိုယ့်အကျိုး ကစားကြရာတွင် နိုင်ငံငယ်များသည် အောက်မှနေပြီး ကစားရသည်က များသည်။ အဘယ်ကြောင့်ဆိုသော် နိုင်ငံငယ်များသည် ကစားပွဲစည်းမျဉ်း များကို မရေးနိုင်၊ နိုင်ငံကြီးများရေးထားသော ကစားပွဲစည်းမျဉ်းများတွင် ဝင်ကစားရသည်။ နိုင်ငံကြီးများမှာ အဖက်ဖက်ကလည်း အင်အားတောင့်တင်းပြီးဖြစ်၊ ခြွေရံ သင်းပင်းနိုင်ငံများကလည်း ပေါများရသည့် အထဲ ယင်းတို့စိတ်ကြိုက် ကစားပွဲ စည်းမျဉ်းများကို ရေးထားသည့်အတွက် နိုင်ငံငယ်များ (ဝါ) နိုင်ငံငယ်ခေါင်းဆောင်များမှာ အတော့်ကို လိမ္မာပါးနပ်လွန်းမှ ခံသာသည်။ အခန့်မသင့်လျှင် ကမ္ဘာ့မြေပုံပေါ်မှပင် ပျောက်သွားနိုင်သည်။
မြန်မာတရုတ် အမေရိကန် သမိုင်းအကျဉ်း
လွတ်လပ်ရေးရပြီးစ ပါလီမန် ဒီမိုကရေစီခေတ်က တရုတ်ဖြူများ၊ တရုတ်နီခေါ် ကွန်မြူနစ်တရုတ်နှင့် အမေရိကန် ပြည်ထောင်စုတို့အကြား မြန်မာနိုင်ငံ ခေါင်းဆောင်များ ဗျာများခဲ့ရပြီး မြန်မာ့မြေ ပေါ်တွင် စစ်တလင်းမဖြစ်အောင် မနည်း ကြိုးစားခဲ့ရသည်။ တရုတ်ပြည်တွင်းတွင် ရှုံးနိမ့်သော အမေရိကန်က ထောက်ခံသည့် တရုတ်ဖြူများ ကျူးကျော်ဝင်ရောက်လာ သည့်အတွက် ကုလသမဂ္ဂသို့ တကူးတက တိုင်ကြားရသည်အထိ ဖြစ်ခဲ့သည်။
ပါလီမန်ဒီမိုကရေစီခေတ် အပြီး ဦးနေဝင်းတက်လာသည့် နောက်ပိုင်းတွင် တံခါးပိတ်လိုက်သဖြင့် အရှေ့တောင် အာရှတွင်း တရုတ်ဆိုဗီယက် အမေရိကန်ပြည်ထောင်စု သုံးပွင့်ဆိုင် အားပြိုင်မှုတွင် ပါဝင်ပတ်သက်ခြင်း မရှိလှပေ။ တစ်ဖန် ဦးနေဝင်းသည် ကွန်မြူနစ် ဆန့်ကျင်ရေးသမား ဖြစ်သဖြင့် အမေရိကန်နှင့် ပလဲနံပသင့်ခဲ့သည်။ ထိုအားပြိုင်မှုတွင် ဗီယက်နမ်၊ ကမ္ဘောဒီးယား၊ လာအို၊ ထိုင်းစသော အရှေ့တောင်အာရှနိုင်ငံများ ပတ်သက်ခဲ့ကြသလို အထိနာခဲ့သည် များရှိသော်လည်း မြန်မာမှာမူ အထိအခိုက် နည်းသည်။ သို့သော် တံခါးပိတ်သဖြင့် စီးပွားရေး အပါအဝင် အထွေထွေကျဆင်းသည်။
တပ်မတော် အစိုးရတက်လာသည့် အခါတွင် အမေရိကန်ပြည်ထောင်စု ကလည်း အရေးယူပိတ်ဆို့ထား၊ တရုတ်ကလည်း စီးပွားရေးချဲ့ထွင်ရန် ကြံချိန်၊ ဆိုဗီယက် ဆန့်ကျင်ရေးတရုတ်နှင့် အမေရိကန်ယာယီ မဟာမိတ်ပျက်ချိန်တို့နှင့် တိုက်ဆိုင်ပြီး တရုတ် မြန်မာ နီးကပ်သွားသည်။ တရုတ်ပါသော စီမံကိန်းကြီးများ ကြောင့်လည်းကောင်း၊ မန္တလေးဘက်တွင် တရုတ်ပြည်မှ တရုတ်များ မြေအများအပြားဝယ်သဖြင့် လည်းကောင်း တရုတ်ဆန့်ကျင်ရေး သဘောထားများ လူထုတွင်း ပျံ့နှံ့လာသည်။
လတ်တလောအခြေအနေ
အမေရိကန်ပြည်ထောင်စုသည် မြန်မာကို အရေးယူပိတ်ဆို့မှု အချို့မှလွဲ၍ ကျန် ပိတ်ဆို့မှုများကို ဆိုင်းငံ့သို့မဟုတ် ရုပ်သိမ်းလိုက်ပြီ။ သို့သော် တိုင်းပြည်တွင်း အခြေအနေပေါ် မူတည်ပြီး ပြန်လည်ထားရှိမည် ဖြစ်သဖြင့် ကဒ်များချန်ထားဆဲဟု ဆိုနိုင်သည်။ လူ့အခွင့်အရေးကိစ္စ ကိုလည်း ကတ်အဖြစ် ကိုင်ထားနိုင်သည်။ တရုတ်နယ်စပ်တွင် တိုင်းရင်းသား လက်နက်ကိုင်အချို့ စခန်းချထားသဖြင့် တရုတ်ဩဇာ အတန်အသင့် ရှိနိုင်သည်။ အမေရိကန်ပြည်ထောင်စုကို လောလောဆယ်တွင် မြန်မာပြည်တွင်းတွင် လူကြိုက်များသည်။ အမေရိကန်သည် ပြည်သူ့ဆက်ဆံရေး Public Relations (PR) လည်း ကျွမ်းကျင်သည်။ အစဉ်အဆက် တည်ဆောက်လာခဲ့သော မိတ်ဟောင်းမိတ်သစ်များလည်း နယ်ပယ်အသီးသီးတွင် ရှိသည်။ တရုတ်နိုင်ငံမှာမူ ယခင့်ယခင် အစိုးရများနှင့် တွဲဆက်၍ စဉ်းစားခံရသဖြင့် လည်းကောင်း၊ လူကြိုက်မများသော စီမံကိန်းများနှင့် တွဲဆက်၍ လည်းကောင်း လူကြိုက်များခြင်း မရှိလှ။ တရုတ်နိုင်ငံ၏ ပြည်သူ့ဆက်ဆံရေး ဗျူဟာများသည် များစွာ တိုးတက်လာခဲ့သော်လည်း PR တွင် ဘိုးအေဖြစ်သည့် အမေရိကန် ပြည်ထောင်စုနှင့် ယှဉ်လျှင် ပြတ်ကျန်နေသည်။
တရုတ်သည် မြန်မာနိုင်ငံ၏ အဓိက ကုန်သွယ်ဖက်၊ အဓိကရင်းနှီးမြှုပ်နှံသူ ဖြစ်သည်။ အမေရိကန် ရင်းနှီးမြှုပ်နှံမှုများမှာမူ မြန်မာ၏ လက်ရှိကုန်ထုတ်လုပ်မှု အဆင့်နှင့် အလှမ်းကွာသဖြင့် တဖြည်းဖြည်းမှသာ ရောက်လာပေမည်။ အမေရိကန်မှာ လက်ရှိကမ္ဘာ့ခေါင်းဆောင် ဖြစ်သဖြင့် မြန်မာ နိုင်ငံကို နိုင်ငံတကာအသိုင်းအဝိုင်း ဝင်ရောက်ရာတွင် အကူအညီများ ပေးနိုင်ခြင်း၊ အရေးယူပိတ်ဆို့မှုများကို ရုပ်သိမ်းနိုင်ခြင်း၊ မြန်မာကို ကူညီအောင် နိုင်ငံတကာ အဖွဲ့အစည်းကြီးများကို တိုက်တွန်းခြင်းစသော အင်အားတို့ကို ပိုင်ဆိုင်ထားသည်။
တရုတ်အမေရိကန် ပြိုင်ဆိုင်မှု
တရုတ်နှင့် အမေရိကန်ပြိုင်ဆိုင်မှုသည် ပြိုင်လည်းပြိုင် ပေါင်းလည်းပေါင်း ထူးထူးဆန်းဆန်း။ အကြီးဆုံးစီးပွားဖက်များ ဖြစ်ပြီးတစ်နိုင်ငံနှင့် တစ်နိုင်ငံအပြန် အလှန်အထင်ကြီးသည်။ အိုဘားမားလက်ထက် အာရှသို့ အမေရိကန်ပြန်ဝင်ပြီး ကတည်းက တရုတ် အမေရိကန်ပြိုင်ဆိုင်မှု ထင်ရှားလာသည်။ အရှေ့တောင်အာရှတွင်းတွင် တောင်တရုတ်ပင်လယ် ကိစ္စသည် အမြင်သာဆုံးဖြစ်သည်။ တရုတ်က အမေရိကန်သည် ဒေသတွင်းနိုင်ငံများကို တရုတ်နှင့် မတည့်အောင် မြှောက်ပေးနေသည်ဟု ထင်ပုံရသည်။ အမေရိကန်ကလည်း တရုတ်သည် ဒေသတွင်းနိုင်ငံများကို အနိုင်ကျင့်သည်ဟု ထင်ပုံရသည်။
ဒေသတွင်းနိုင်ငံများသည် တရုတ်နှင့် မပြတ်နိုင်သလို အမေရိကန်နှင့်လည်း မကင်းနိုင်။ မြန်မာသည်လည်း ထိုနည်းလည်းကောင်း။ ဘယ်အရင်လဲ။ ဒေါ်အောင်ဆန်းစုကြည် တရုတ်သို့ အရင်သွားမလား၊ အမေရိကန်ပြည်ထောင်စုသို့ အရင်သွားမလား လူအများ စိတ်ဝင်စားနေကြသည်။ အိုဘားမားက သူအနားမယူခင် လာစေချင်သည်။ တရုတ်ကလည်း ဒေါ်အောင်ဆန်းစုကြည် လာလည်ရန် အကြိမ်ကြိမ်ဖိတ်ကြားသည်။
အမေရိကန်နှင့် တရုတ်သည် မြန်မာ့ ပြုပြင်ပြောင်းလဲရေး မစမီ လွန်ခဲ့သော နှစ်နှစ်ဆယ် နှစ်ဆယ့်ငါးနှစ်အတွင်း မြန်မာနှင့် ဆက်ဆံရာတွင် လားရာချင်း၊ စမှတ်ချင်းကွာ ခြားသည်။ တရုတ်က တပ်မတော်နှင့် အစိုးရကိုသာ အဓိကထားသည်။ အမေရိကန်က တပ်မတော်နှင့် အစိုးရကလွဲလျှင် ကျန်သည့်အဖွဲ့အစည်းများ၊ လူပုဂ္ဂိုလ်များ ဥပမာ အတိုက်အခံ နိုင်ငံရေးသမားများ၊ အရပ်ဘက် လူ့အဖွဲ့အစည်းများကို ဆက်ဆံသည်။ မြစ်ဆုံကိစ္စအပြီးတွင် တရုတ်သည် ကျန် Player များဘက်ကို အာရုံစိုက်လာသည်၊ တွေ့ဆုံသည်၊ တရုတ်သို့ အလည်အပတ် ဖိတ်သည်။ အမေရိကန်ကမူ ပြုပြင်ပြောင်းလဲရေး နှင့်အတူ တပ်မတော်နှင့် (ယခင်) အစိုးရကို ဆက်ဆံလာသည်။
အမေရိကန်နှင့် ဒေါ်အောင်ဆန်းစုကြည် ရင်းနှီးပြီးဖြစ်ရာ တရုတ်သို့ အရင် သွားနိုင်သည်ဟု တွက်ဆမိသည်။ အိုဘားမားကို မှီချင်လျှင်၊ အမေရိကန်ရင်းနှီးမြှုပ်နှံမှုများ အမြန်လိုချင်လျှင်မူ အမေရိကန်သို့ အရင်သွားမည် ဖြစ်သည်။ အိုဘားမား မရှိတော့သည့် အချိန်တွင် လက်ရှိသမ္မတ ရှီကျင့်ဖျင် ဆက်ရှိနေဦးမည် ကိုလည်း သတိထားရမည်။ တရုတ်သို့သွားလျှင် မြစ်ဆုံကိစ္စ ပြောရ ဆိုရမည်ဖြစ်ရာ မြန်မာဘက်တွင် အဖြေတစ်စုံတစ်ရာ မရှိဘဲ သွားမည်မဟုတ်ဟု ထင်ရသည်။ စာချုပ်မဖတ်ရသေးဟု ပြော၍လည်း ယခုတစ်ကြိမ်တွင် မရနိုင်။ သို့သော် တရုတ်နှင့် မြန်မာသည် အပြန်အလှန် လိုအပ်နေ သည့်အတွက် မြစ်ဆုံကိစ္စကြောင့် မြန်မာ တရုတ် ဆက်ဆံရေးပျက်စရာ မရှိနိုင်ဟု မြင်ပါသည်။
ဟီလာရီသည် အိုဘားမား၏ မြန်မာမူဝါဒကို အကောင်အထည်ဖော်သူလည်း ဖြစ်၊ ဒေါ်အောင်ဆန်းစုကြည် နှင့်လည်း ပုဂ္ဂိုလ်ရေး ရင်းနှီးသူဖြစ်သဖြင့် သူတက်လာလျှင် အမေရိကန်မြန်မာ ဆက်ဆံရေး ပိုကောင်းနိုင်သည်၊ မူဝါဒလည်း ထူးထူးခြားခြား ပြောင်းမည်မဟုတ်။ ထရမ့် သမ္မတဖြစ်လာလျှင်မူ ပြောင်းကောင်းပြောင်းနိုင်သည်။
ဒေါ်အောင်ဆန်းစုကြည်၏ တရုတ် အမေရိကန်ဆက်ဆံရေး၊ နိုင်ငံခြားရေး ကိုင်တွယ်ပုံကို မြည်းစမ်းလိုလျှင် ဒေါ်အောင်ဆန်းစုကြည် ပထမဦးဆုံး တက်ရောက်သည့် အာဆီယံ နိုင်ငံခြားရေးဝန်ကြီး အစည်းအဝေးကို ကြည့်နိုင်သည်။ ထိုအစည်းအဝေးတွင် အမေရိကန်နှင့် တရုတ်တို့ တက်ရောက်ကြသည်။ တောင်တရုတ်ပင်လယ်ကိစ္စ ပြင်းပြင်းထန်ထန် ဆွေးနွေးကြသော်လည်း မြန်မာသည် တရုတ်နှင့် အမေရိကန်ရော အချင်းဖြစ်အာဆီယံနိုင်ငံ များနှင့်ပါ အဆင်ပြေ ချောမွေ့အောင် နေနိုင်ခဲ့သည်။ ဒေါ်အောင်ဆန်းစုကြည်သည် သူ့ထက် အာဆီယံလုပ်ထုံးလုပ်နည်း ကျွမ်းကျင်သော နိုင်ငံခြားရေး ဝန်ကြီးဌာန အဖွဲ့သားများ အကြံပေးသည့် အတိုင်း လိုက်နာခဲ့သည်ဟု ထုတ်ဖော်ဂုဏ်ပြုခဲ့ရာ နောင်တွင်လည်း ယခုကဲ့သို့ ကျင့်ကြံသွားမည်ဟု မြင်ရသည်။
သုံးပွင့်ဆိုင် အမေရိကန်ပြည်ထောင်စုတည်း ဟူသော လက်ရှိမဟာအင်အားကြီး နိုင်ငံ၊ အိမ်နီးချင်း မဟာအင်အားကြီး လောင်းလျာ တရုတ်နိုင်ငံတို့၏ ကစားကွက် အတွင်း ဒေါ်အောင်ဆန်းစုကြည် ဝင်ကစား သည်ဖြစ်စေ၊ ဒေါ်အောင်ဆန်းစုကြည်က ကိုယ်ပိုင်ကစားကွက် အတွင်း ဝင်ကစား သည်ဖြစ်စေ သူ့ကို နှစ်နိုင်ငံလုံးက လေးစားကြသဖြင့် အတိုင်းအတာတစ်ခုအထိ အားသာချက်ရပြီး ဖြစ်သည်။
ဒေါ်အောင်ဆန်းစုကြည် အနေနှင့် ‘ဖွင့်ကစားမည်’ ဟုထင်သည်။
ဇေယျသူ

No comments: