Thursday, August 4, 2016

ဝန်ကြီးဌာန၏ ထုတ်ပြန်ချက်များနှင့် သတင်းမှန်ကို သေချာနားထောင်ရန် လိုကြောင်း ၀န်ကြီး ဒေါက်တာ ဦးဝင်းမြတ်အေးပြောကြား

ဝန်ကြီးဌာန၏ ထုတ်ပြန်ချက်များနှင့် သတင်းမှန်ကို သေချာနားထောင်ရန် လိုကြောင်း ၀န်ကြီး ဒေါက်တာ ဦးဝင်းမြတ်အေးပြောကြား
 
4 August 2016
-------- ------ -------
မြန်မာနိုင်ငံအတွင်း ကြုံတွေ့နေရသည့် ရေဘေးဒုက္ခများ နှင့် ပတ်သက်၍ ၀န်ကြီးဌာန၏ ထုတ်ပြန်ချက်များကို သေချာမပြတ် စောင့်ကြည့်ရန်နှင့် သတင်းမှန်ကို သေချာနားထောင်ရန် လိုကြောင်း၊ လူမှုဝန်ထမ်း ကယ်ဆယ်ရေး နှင့် ပြန်လည်နေရာချထားရေး ဝန်ကြီးဌာန ပြည်ထောင်စုဝန်ကြီး ဒေါက်တာဝင်းမြတ်အေး က ဧရာဝတီသတင်းဌာနနှင့် အင်တာဗျူးတွင် ပြောဆိုထားသည်။
“ပြည်သူလူထုကို ပြောချင်တာက သတင်းတွေက ဘယ်လို ဖြစ်နေလဲဆိုတော့ ဟိုတနှစ်က ဓာတ်ပုံတွေနဲ့ စာတွေနဲ့ ကို ပြန်တင်တယ်။ ပြန်တင်တော့ အခုပဲဖြစ်နေသလိုလို အရေးပေါ်အခြေအနေ မကြေညာသေးဘူးလားပေါ့။ ဘယ်လောက် အထိအောင် ဘယ်လိုဖြစ် နေပြီဆိုတာမျိုးလုပ်တော့ သတင်းတွေကို သေချာစိစစ်ပြီးမှ ယုံစေချင်တယ်။ မြန်မာ့အသံက ထုတ်လွှင့်တာရယ်၊ မိုး/ဇလက ကြေညာတာ ရယ်နဲ့ ကျွန်တော်တို့ ၀န်ကြီးဌာနက ထုတ်ပြန်တာတွေကိုပဲ သေချာမပြတ် စောင့်ကြည့်ပါလို့။ သတင်းအမှားတွေနဲ့ facebook မှာလို ထင်ယောင်ထင်မှား ဖြစ်အောင် တင်တာတွေ ရှိတယ်။ မိုးလေ၀သ ပညာရှင်ကြီးတွေ ရဲ့ သိပ်တော်တဲ့ ခန့်မှန်းချက်တွေ ရှိတယ်။ ဒါပေမယ့် မနှစ်ကဟာတွေ။ အဲဒါကို စာအပိုဒ်လိုက် ပြန်တင်ပြီးတော့ ဒီနှစ် ဖြစ်သယောင်ယောင် လုပ်ကြတယ်။ သတင်းမှန်တွေကို သေချာနားထောင်ဖို့ လိုပါတယ်ဆိုတာကို ပြည်သူကို ပြောချင်တယ်” ဟု ဒေါက်တာဝင်းမြတ်အေးက ပြောကြားခဲ့ခြင်းဖြစ်သည်။
ဧရာဝတီမြစ်နှင့် ချင်းတွင်းမြစ်ရေသည် ဇူလိုင်လနှင့် သြဂုတ်လအတွင်း မြစ်ရေမြင့်တက်လာမှုကြောင့် ကချင်ပြည်နယ်၊ မန္တလေးတိုင်းဒေသကြီး၊ စစ်ကိုင်းတိုင်း ဒေသကြီး၊ မကွေးတိုင်းဒေသကြီး၊ ဧရာဝတီတိုင်းဒေသကြီး နှင့် ပဲခူးတိုင်းဒေသကြီး အတွင်းရှိ မြို့နယ်/ကျေးရွာအချို့တွင် ရေကြီးရေလျှံမှုများဖြစ်ပေါ်ခဲ့သည်။
ရေကြီးရေလျှံမှုများသည် အရေးပေါ်ကြေညာရလောက်သည့် အဆင့်မဟုတ်ကြောင်း အပိုင်းလိုက် အပိုင်းလိုက်များ ဖြစ်ခြင်းကြောင့် ဖြစ်သည့် နေရာကို နိုင်နိုင်နင်းနင်း လုပ်ဆောင်နေသည်ဟု ဧရာဝတီသတင်းဌာနနှင့် အင်တာဗျူးတစ်ခုတွင် ပြည်ထောင်စုဝန်ကြီး ဒေါက်တာဝင်းမြတ်အေး ကပြောဆိုထားသည်။
“ဖြစ်တဲ့နေရာကို ကြည့်လိုက်ရင်တော့ facebook မှာပဲ ဖြစ်ဖြစ်၊ မီဒီယာမှာပဲ ဖြစ်ဖြစ် အရမ်းကို အကြီးအကျယ်ကြီးကို ဖြစ်နေတာ။ ဒါပေမယ့် တစ်နိုင်ငံလုံး အတိုင်းအတာနဲ့ ဖြစ်တဲ့သဘော မဟုတ်တဲ့အတွက် အရေးပေါ်အခြေအနေ မကြေညာ သေးတာပါ။ အရေးပေါ် ကြေညာရလောက်တဲ့ အဆင့်မဟုတ်ဘူး။ အပိုင်းလိုက် အပိုင်းလိုက်လေးတွေ ဖြစ်တာ။ ဖြစ်တဲ့နေရာကို အခု နိုင်နိုင်နင်းနင်း လုပ်နေတယ်။”ဟု ဒေါက်တာဝင်းမြတ်အေးကပြောဆိုထား သည်။
ထို့အတူ “ယခုလက်ရှိဖြစ်ပေါ်နေသောရေကြီးရေလျံမှုနှင့် ပတ်သက်၍ နိုင်ငံတော်အစိုးရအနေဖြင့် ထိရောက်စွာ ကူညီနိုင်ရန် ကြိုးပမ်းလျက်ရှိပါသည်။ ပြည်သူများအား ရှင်းလင်းတင်ပြလျက် ရှိပါသည်။ သဘာဝဘေး အန္တရာယ် ကျရောက်သော ဒေသဖြစ်ကြောင်း ကြေညာခြင်းနှင့်ပတ်သတ်၍ လိုအပ်ပါက ဥပဒေနင့်အညီ ဆောင်ရွက်သွားပါမည်” ဟု ပြည်ထောင်စုဝန်ကြီး ဒေါက်တာဝင်းမြတ်အေး က ၎င်း၏ လူမှုကွန်ရက်စာမျက်နှာတွင် ရေးသားထားသည်။
သဘာဝဘေးအန္တရာယ်ဆိုင်ရာ စီမံခန့်ခွဲမှု ဥပဒေ ၊၂၀၁၃ ခုနှစ်နှင့် သဘာဝဘေးအန္တရာယ်ဆိုင်ရာ စီမံခန့်ခွဲမှု နည်းဥပဒေများ ၂၀၁၅ ခုနှစ် အရ သဘာဝဘေး အန္တရာယ် ကျရောက်သော ဒေသဖြစ်ကြောင်း ကြေညာခြင်းနှင့် ပတ်သက်၍ အခန်း ၅ ပုဒ်မ ၁၁ တွင် နိုင်ငံတော်သမ္မတသည် နိုင်ငံတော် တစ်ဝန်းလုံးတွင် သော်လည်းကောင်း၊ နိုင်ငံတော်၏ နယ်မြေဒေသ တစ်ခုခုတွင်သော်လည်းကောင်း အသက်အိုးအိမ်စည်းစိမ်နှင့် သဘာဝပတ်ဝန်းကျင် ထိခိုက်ပျက်စီးမှု အလွန်ကြီးမားသည့် ဘေးအန္တရာယ် ကျရောက်ကြောင်း အမျိုးသားကော်မတီက တင်ပြ၍ ဖြစ်စေ၊ အခြားတစ်နည်းနည်းဖြင့် ဖြစ်စေ သိရှိရသည့်အခါ ယင်းဒေသကို မူလအခြေအနေသို့ အမြန်ပြန်လည် ရောက်ရှိစေရေးဆောင်ရွက်ရာတွင် အခက်အခဲရှိမည်ဟု ယုံကြည်ပါက အဆိုပါဒေသကို အချိန်ကာလနှင့် နယ်မြေဒေသ ပိုင်းခြားသတ်မှတ်၍ သဘာဝဘေးအန္တရာယ် ကျရောက်သော ဒေသဖြစ်ကြောင်း ကြေညာနိုင်သည်ဟု ဖော်ပြထားသည်။
ဇော်မင်းထွန်း
The Ladies News

No comments: