Wednesday, August 3, 2016

နေရပ်ပြန်ချင်သော မြန်မာဒုက္ခသည်များအတွက် အကူအညီပေးရေး စင်တာများ ဖွင့်မည်

နေရပ်ပြန်ချင်သော မြန်မာဒုက္ခသည်များအတွက် အကူအညီပေးရေး စင်တာများ ဖွင့်မည်

Wednesday, August 3, 2016
 
မိမိ ဆန္ဒအလျောက် နေရပ်ပြန်ချင်သော မြန်မာဒုက္ခသည်များအတွက် အကူအညီပေးမည့် ၀န်ဆောင်မှု စင်တာများကို ထိုင်း-မြန်မာ နယ်စပ်ရှိ မြန်မာဒုက္ခသည်စခန်း ၉ ခုတွင် ယခုလ နှောင်းပိုင်း၌ စတင် တည်ထောင်သွားမည် ဖြစ်ကြောင်း သိရသည်။
ဒုက္ခသည်များအနေဖြင့် နေရပ်ပြန်ရန် ၎င်းတို့၏ ရည်ရွယ်ချက်များကို အဆိုပါ “Voluntary Repatriation Centers” များတွင် တင်ပြနိုင်ပြီး အကြံဥာဏ်များ၊ ဆွေးနွေးလမ်းညွှန်မှုနှင့် နေရပ်ပြန်ရန် အထောက်အပံ့များကို ရရှိနိုင်သည်။ ယင်းစင်တာကို ထိုင်းအစိုးရနှင့် ပူးပေါင်း၍ တရားဝင် ဆောင်ရွက်ခဲ့ကြောင်း သိရသည်။
ထိုစင်တာများ တည်ထောင်ခြင်းက ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံး (UNHCR) နှင့် ရွှေပြောင်းသွားလာ သူများဆိုင်ရာနှင့် နိုင်ငံတကာအဖွဲ့အစည်း(IOM) တို့က ပြင်ဆင်နေသော ဒုက္ခသည်များ နေရပ်ပြန်ပို့ရေး လုပ်ငန်းစဉ် တခု၏ အစိတ်အပိုင်း ဖြစ်သည်။
ဇွန်လတွင် နိုင်ငံတော် အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည် ထိုင်းနိုင်ငံသို့ လာရောက်စဉ်အတွင်း ထိုင်းနှင့် မြန်မာအစိုးရ အကြား ပူးပေါင်းဆောင်ရွက်မှု သဘောတူညီချက်တခုက မြန်မာဒုက္ခသည်များ နေရပ်ပြန်ရေးအတွက် အဆင်ပြေစေခဲ့သည်။ သူ၏ခရီးစဉ်အတွင်း ဒေါ်အောင်ဆန်းစုကြည်က ဒုက္ခသည်များအား အမိနိုင်ငံသို့ ပြန်လာရန် လူသိရှင်ကြား ကြိုဆိုခဲ့ပြီး ၎င်းတို့အတွက် မြန်မာနိုင်ငံက တာဝန်ရှိကြောင်း ပြောခဲ့သည်။ ဇွန်လ နှောင်းပိုင်းတွင် ကနဦးခြေလှမ်းတခုအနေဖြင့် နယ်စပ်စခန်းများမှ ဒုက္ခသည် ၁၉၆ ဦးအား နေရပ်ပြန်ပို့မည် ဖြစ်ကြောင်း မြန်မာအစိုးရက ကြေညာခဲ့သည်။
ထိုင်းနိုင်ငံ နယ်စပ်မြို့ဖြစ်သော မဲဆောက်တွင် UNHCR ၏ စီနီယာ Field Coordinator ဖြစ်သူ အီယန် ဟောလ် (Iain Hall) က “ဘယ်ဒုက္ခသည်မဆို မိမိဆန္ဒအလျောက် နေရပ်ပြန်ချင်သူတွေကို အကူအညီပေးတဲ့ ၀န်ဆောင်မှုကို ဒုက္ခသည်စခန်း အားလုံးမှာ ပြုလုပ်ဖို့ ဒီဝန်ဆောင်မှုစင်တာ အသစ်တွေကို ဒီဇိုင်းရေးဆွဲပြီးပါပြီ။ IOM က တည်ဆောက်ပေးပါလိမ့်မယ်။ အဲဒီစင်တာတွေကို ဒုက္ခသည်တွေ အလွယ်တကူ သတင်းအချက်အလက် ရနိုင်တဲ့ အချက်အချာကျတဲ့ နေရာတွေမှာ တည်ဆောက်သွားမှာပါ” ဟု ဧရာဝတီသို့ ပြောသည်။
ထို့အပြင် UNHCR, IOM နှင့် ထိုင်းအစိုးရတို့က ဆောင်ရွက်သော မိမိဆန္ဒအလျောက် နေရပ်ပြန်ခြင်း လုပ်ငန်းစဉ်အတွက် နေရာများကိုလည်း ပြုလုပ်သွားမည်ဖြစ်ကြောင်း ၎င်းကပြောသည်။
ထိုင်း-မြန်မာနယ်စပ်ရှိ ဒုက္ခသည်စခန်း ၉ ခုတွင် စာရင်းသွင်းထားသော မြန်မာဒုက္ခသည် ဦးရေ ၁၂၀၀၀၀ ခန့်ရှိသည်။စစ်ပွဲများဖြစ်ပွားနေသော ကရင်ပြည်နယ် ဒေသများမှ လွတ်မြောက်လာကြ ကတည်းက ဒုက္ခသည်အများစုမှာ နေရပ်ပြန်ရန် လုံခြုံမှုမရှိဟု ခံစားနေရဆဲဖြစ်သည်။
၂၀၁၂ခုနှစ်တွင် ယခင်အစိုးရနှင့် အကြီးဆုံး ကရင် တိုင်းရင်းသား လက်နက်ကိုင် အဖွဲ့အစည်းဖြစ်သော ကရင်အမျိုးသား အစည်းအရုံး (KNU) အကြား အပြစ်အခတ်ရပ်စဲရေး သဘောတူညီချက် ရရှိခဲ့သော်လည်း ကရင်ပြည်နယ်တွင် အစိုးရ တပ်မတော်က ကျေးရွာအများအပြားကို သိမ်းပိုက်ထားဆဲဖြစ်သည်။ ပြီးခဲ့သည့်နှစ် အောက်တိုဘာလက နိုင်ငံလုံးဆိုင်ရာ အပစ်အခတ်ရပ်စဲရေး သဘောတူစာချုပ်တွင် KNU ကလည်း လက်မှတ်ရေးထိုးခဲ့သည်။
UNHCR ရဲ့ သဘောတူညီချက်အရ IOM မှတဆင့် ပြန်လည် ပေါင်းစည်းရေးအတွက် ခရီးစရိတ်အတွက် ငွေကြေး၊ World Food Programme မှ တဆင့် အစားအစားများ အပါအ၀င် နေရပ်ပြန်မည့်သူများအတွက် အထောက်အပံ့များကို ထိုဝန်ဆောင်မှု စင်တာများတွင် ရရှိလိမ့်မည်ဟု အီယန် ဟောလ်က ပြောသည်။
ထိုအစီအစဉ်တွင် စင်တာသို့ လာရောက်ပြီး နေရပ်ပြန်ရန် ၎င်းတို့၏ ဆုံးဖြတ်ချက်ကို ပြောပြသော ဒုက္ခသည်များအတွက် တဦးတယောက်ချင်း ကာကွယ်ရေး ဆွေးနွေးမှုများကိုလည်း UNHCR က ဆောင်ရွက်ပြုလုပ်သွားမည်ဖြစ်သည်။
အစိုးရမဟုတ်သော အဖွဲ့အစည်း တခုဖြစ်သည့် Handicap International ကလည်း မြေမြှုပ်မိုင်းများနှင့် ပတ်သက်သော အကြောင်းအရာအပါအ၀င် Risk Awareness sessions များကိုလည်း ထောက်ပံ့သွားမည်ဖြစ်သည်။
“ဒုက္ခသည်တွေ နေရပ်ပြန်ဖို့ကို UNHCR က အားမပေးတဲ့ အချိန်မှာ ဒီစင်တာတွေက သူတို့ရဲ့ ဆန္ဒအရ နေရပ်ပြန်ဖို့ ဆုံးဖြတ်တဲ့ ဘယ်ဒုက္ခသည်ကိုမဆို အဆင်ပြေစေဖို့ ကူညီဖို့ အသင့်ဖြစ်နေပါတယ်” ဟု ဟောလ်က ပြောသည်။
ထိုင်း-မြန်မာနယ်စပ်မှ လေ့လာသုံးသပ်သူများနှင့် သတင်းအရင်းအမြစ်များက ဒုက္ခသည်များ မိမိဆန္ဒအလျောက် နေရပ်ပြန်ရန်အတွက် အကြို စီမံကိန်းများကို သြဂုတ်လတွင် ထိုင်းနိုင်ငံ တာ့ခ်ခရိုင်ရှိ Nu Po ဒုက္ခသည်စခန်းတွင် စတင်ပြုလုပ်သွားမည်ဖြစ်ကြောင်း ပြောသည်။
မီဒီယာသို့ ဖြေကြားရန် အခွင့်မရှိသည့်အတွက် အမည်မဖော်လိုသူ ထိုအရေးကို လေ့လာကျွမ်းကျင်သူတဦးက ယခုအချိန်ထိ နေရပ်ပြန်ရေး အဆင်ပြေရန် UNHCRသို့ အကူအညီတောင်းခဲ့သော ဒုက္ခသည် ၅၅ ဦးအထိ ရှိကြောင်း ပြောသည်။
ပြီးခဲ့သည့်အပတ်က တာ့ခ်ခရိုင်ရှိ မယ်လဒုက္ခသည် စခန်းတွင် ပြုလုပ်သည့် ၂ ရက်ကြာ အဖွဲ့ဝင်များ အစည်းအဝေးပွဲအတွင်း “Voluntary Repatriation Centers” ဖွင့်လှစ်ခြင်းနှင့် ပတ်သက်၍ ကြေညာချက်ကို ထုတ်ပြန်ခဲ့ခြင်းဖြစ်ကြောင်း ၎င်းကဆိုသည်။ အဆိုပါ အစည်းအဝေးသို့ အန်ဂျီအိုအဖွဲ့များ၊ လူ့အဖွဲ့အစည်းအခြေစိုက် အဖွဲ့အစည်းများနှင့် ဒုက္ခသည်စခန်း ကော်မတီအဖွဲ့များ တက်ရောက်ခဲ့ကြသည်။
ကရင်ဒုက္ခသည် ကော်မတီ (KRC)၊ ကရင်နီဒုက္ခသည် စခန်းကော်မတီ (KnRC) နှင့် အခြားအဖွဲများ ကဲ့သို့ ဒုက္ခသည်များကို ကိုယ်စားပြုသည့် အဖွဲ့များကို ထိုအကြောင်းအရာနှင့် ပတ်သတ်၍ ယခင်က အသိပေးခြင်း မရှိကြောင်း ယုံကြည်စိတ်ချရသော သတင်းအရင်းအမြစ် အချို့၏ အဆိုအရ သိရသည်။ UNHCR က အဆိုပါ ကိစ္စရပ်နှင့် စပ်လျဉ်း၍ ထိုင်းအစိုးရနှင့် ဆွေးနွေးမှုများစွာ ပြုလုပ်ရမည်ဖြစ်ပြီး မြန်မာအစိုးရကလည်း နေရပ်ပြန်လာသော ဒုက္ခသည်များ လက်ခံရန် ကတိပေး ပြင်ဆင်ထားကြောင်းပြောသည်။
Irrawaddy
၂၀၁၄ ခုနှစ်က မယ်လ ဒုက္ခသည်စခန်းတွင် လူဦးရေစာရင်း ကောက်ယူစဉ် (ဓာတ်ပုံ - Reuters)

No comments: