Wednesday, August 3, 2016

နိုင်ငံနှင့်လူမျိုးကို တကယ်ချစ်ရင်

နိုင်ငံနှင့်လူမျိုးကို တကယ်ချစ်ရင်
 
3 August 2016
 
အမျိုးသားရေးဝါဒီ သမားဆိုတာဟာ တခြား လူမျိုးစုငယ်တွေကိုလည်း မဖိနှိပ်ဘူး အမျိုးသားရေးဝါဒ မှာ နိုင်ငံရေးအရ ဆိုရင် လူမျိုးစု အသီးသီး ရဲ့ အမှီအခိုကင်း ရပ်တည်ခွင့်၊ ကိုယ့်ကြမ္မာ ကိုယ် ဖန်တီးခွင့်၊ ကိုယ်ပိုင်အုပ်ချုပ်ခွင့်၊ လွတ်လပ်ခွင့်၊ နှစ်သက်ရာ ကိုးကွယ်ယုံကြည်ခွင့် ကို အပြည့်အဝ ထောက်ခံအားပေးရတယ်။
စစ်မှန်တဲ့ အမျိုးသားရေးဝါဒီ တယောက်က တမျိုး၊ တဘာသာ တည်း သီးသန့် ပြောဆို ဆွေးနွေးမှုမျိုး၊ အမြင်မျိုး၊ ကျဉ်းမြောင်းမှုမျိုး ဘာအကြောင်းပြချက်နဲ့မှ မလုပ်ဘူး။
ကိုလိုနီခေတ်က လိုအပ်ချက်အရ လှုပ်ရှား တည်ရှိလာခဲ့ရတဲ့ လွတ်လပ်ရေးလှုပ်ရှားမှု အမျိုးသားရေး လှုပ်ရှားမှု အနှစ် သဘောဟာ မျက်မှောက်ခေတ် နိုင်ငံရေးမှာ တလွဲ အသုံးချခံ ဖြစ်နေရတယ်။အမျိုးသား နိုင်ငံရေး ရည်မှန်းချက် ဆိုပြီး အတွင်း သဘောမှာ အာဏာနိုင်ငံရေး၊ အုပ်စု နိုင်ငံရေး၊ စစ်အုပ်စု ရှင်သန်ရေးမှာပဲ အဆုံးသတ်နေတာတွေပဲ တွေ့နေရတယ်။
ဒီလို အမျိုးသားရေးဝါဒ ဆက်စပ် ပြောဆိုမှုတွေ၊ အငြင်းပွားမှုတွေ၊ လှုပ်ရှားမှုတွေ များပြားလာခြင်းဟာ အာဏာ နိုင်ငံရေး ပယောဂ ကြောင့်ဆိုတာ ထင်ရှားနေပါတယ်။
“Nationalism” ဆိုတဲ့ အင်္ဂလိပ်စကားလုံး က မိမိ မွေးဖွားကြီးပြင်းရာ တိုင်းပြည် ကို ချစ်မြတ်နိုးခြင်း၊ မိမိ တိုင်းပြည်ကို နိုင်ငံရေး၊ အုပ်ချုပ်ရေး၊ စီးပွားရေး အရ အမှီအခို ကင်းကင်း၊ မိမိဘာသာ ရပ်တည်စေလိုခြင်း၊ ဘယ်နိုင်ငံ သြဇာခံ၊ ဘယ်သူ့ လက်အောက်ခံ မှ မဟုတ်ဘဲ လွတ်လပ်စွာ ရပ်တည်စေလိုခြင်း လို့ အဓိပ္ပါယ် ရတယ်။
မိမိ နိုင်ငံကို ချစ်ခြင်း၊ မိမိနိုင်ငံ ကို သူတပါး ကျွန် မဖြစ်စေလိုခြင်းဆိုတာဟာ အတွေးအခေါ်ပိုင်းအရ ကျဉ်းမြောင်း အစွန်းရောက်ခြင်းမျိုး ကိုဆိုလိုတာ မဟုတ်ပါဘူး။ အသားအရောင်၊ လူမျိုး တမျိုး၊ ဘာသာ တခု ကို အခြေမခံ၊ လူမျိုး-ဘာသာစုံပါ တိုင်းပြည် ကိုသာ အခြေခံတယ် လို့ ဆိုလိုပါတယ်။
ပထဝီဝင် ဒေသတခုရဲ့ ဘာသာစကား၊ လူမျိုး၊ ကိုးကွယ်မှု မတူကြတဲ့ လူမျိုးစုတွေမှာ ဓလေ့ထုံးချင်း၊ ယဉ်ကျေးမှုချင်း ဆက်စပ်နေတာတွေလည်း အများကြီး ရှိတယ်။လူမျိုးစုံ၊ ဘာသာစုံ၊ အယူဝါဒစုံ၊ စကားစုံ သူတွေ မှီတင်းနေထိုင်နေတာ မှန်သော်လည်း အတွေးအခေါ်၊ အယူဝါဒ၊ ဓလေ့ စရိုက်၊ ဝတ်စားဆင်ယင်မှု၊ အစားအသောက် ပုံစံ၊ အယူသီးမှု၊ လက်ခံယုံကြည်မှု၊ စကားပုံ၊ ပုံပြင်၊ နီတိ အစရှိတဲ့ အကြောင်း၊ သဘောတွေမှာ ဘုံတူညီ မျှဝေ တည်ရှိနေတာတွေ အများကြီး ရှိတယ်။
ဒါ့ကြောင့် အမျိုးသားရေးဝါဒ ဟာ တသွေးတည်း၊ လူမျိုး တမျိုးတည်း၊ ဘာသာ တခုတည်း လုံးလုံး အဓိပ္ပာယ်ပေါက် မသက်ရောက် ဘူး ဆိုတာပါ။
ဖက်ဒရယ် ပြည်ထောင်စုစနစ်မှာ တဦးတဖွဲ့ချင်း အသိအမှတ်ပြုခြင်းနဲ့ ခွဲခြားလို့မရဘဲ တစည်းတလုံးတည်း တန်းတူရည်တူဖြစ်မှုဟာ တပြိုင်နက်တည်း တည်ရှိနေပါတယ်။မတူကွဲပြားနေတဲ့ လူမျိုးများ၊ ပြည်နယ်များ၊ အုပ်စုများက အတူတကွစုစည်းလို့ အချုပ်အခြာအာဏာကို ခွဲဝေအုပ်ချုပ်တဲ့ အယူအဆတရပ်လည်း ဖြစ်ပါတယ်။
ဖက်ဒရယ်ပြည်ထောင်စုစနစ်မှာ ပုံသေ တသမတ်တည်းမယူဆရဘဲ၊ အချင်းချင်း အပေးအယူ၊အလျော့အတင်းများရှိကြပါတယ်။အရေးကိစ္စရပ်တိုင်းကို ကျယ်ကျယ်ပြန့်ပြန့်နက်နက်ရှိုင်းရှိုင်း စဉ်းစားညှိနှိုင်း ဆွေးနွေးကြရပါတယ်။
စုစည်းညီညွတ်မှုဟာ စစ်မှန်တဲ့ စိတ်ရင်းစေတနာနဲ့ အပြန်အလှန်လေးစား အသိအမှတ်ပြုမှုတွေကို အခြေခံရပါတယ်။
ပြည်နယ်များအချင်းချင်း စိတ်တူကိုယ်တူ သဘောတူလက်ခံတဲ့ ဘုံသဘောတူညီတဲ့ စိတ်ဓါတ်တူညီမှု ရှိရေးဟာ အဓိကကျပါတယ်။
ကိုယ့်နိုင်ငံကို ယဉ်ကျေးမှုနဲ့ ဒီမိုကရေစီ မြင့်မြင့်မားမားရှိတဲ့ နိုင်ငံအဖြစ်ထူတောင်နိုင်ဖို့ အရေးကြီးတဲ့ နိုင်ငံရေးစနစ်တရပ်လည်း ဖြစ်တယ်ဆိုတာကို နုလုံးသွင်းကြရပါမယ်။
ဒီလို နိုင်ငံရေးစနစ်တရပ်ကို ကျင့်သုံးခြင်းဟာ ပြည်သူ့အုပ်ချုပ်ရေးဆိုတဲ့ ဒီမိုကရေစီကို ပိုမိုအားကောင်းလာစေပါတယ်။ ဒီမိုကရေစီရှိရှိ ပြည်ထောင်စုစစ်စစ် နိုင်ငံတော်ကို ထူထောင်နိုင်ပါလိမ့်မယ်။

No comments: