Thursday, August 4, 2016

Oburma မှ လက်ဆွဲနှုတ်ဆက်လိုက်သော Burma ၏ အနာဂတ် ပြုပြင်ပြောင်းလဲရေး ( အပိုင်း ၁ ) ( အပိုင်း ၂ )

ပထ၀ီနိုင်ငံ့ရေးအရ အင်အားကြီးနိုင်ငံ ၂ခုဖြစ်တဲ့ တရုတ်နဲ့ အမေရိကန်က စီးပွားရေးအင်အားတောင်တင်းဖို့ သယံဇာတ သဘာဝအရင်းအမြစ်ကြွယ်ဝတဲ့ မြန်မာပြည်ကို စစ်မှန်တဲ့ ငြိမ်းချမ်းရေးဖြစ်ဖို့ လိုလားနေပြီလား..ဆောင်းပါးဟောင်းလေးကို ပြန်လည်တင်ပြပါရစေ..။
အောင်ခိုင်မြင့်
၃ သြဂုတ်လ ၂၀၁၆
********************************

Oburma မှ လက်ဆွဲနှုတ်ဆက်လိုက်သော Burma ၏ အနာဂတ် ပြုပြင်ပြောင်းလဲရေး ( အပိုင်း ၁ )
၁၉ နိုဝင်ဘာ ၂၀၁၂

ယနေ့ ကမ္ဘာကြီးသည် ယခင်ကကဲ့သို့  နိုင်ငံရေး ၊ စစ်ရေးအားပြိုင်မှုများကို ကိုယ်သန်ရာ မျက်နှာဖုံးများစွပ်လျက် အားပြိုင်လုပ်ဆောင်ခြင်းများအစား ဘုံ အကျိုးစီးပွားအတွက် ပွင့်လင်းမြင်သာစွာ အတူတစ်ကွ ပူးပေါင်းလုပ်ဆောင်မှုခြေလှမ်းများ လုပ်ဆောင်လာကြသည် ။ ဆိုလိုသည်မှာ့  စီးပွားရေးအရ ဖြစ်စေ ၊ နိုင်ငံရေးအရဖြစ်စေ ယခင်ကကဲ့သို့  တစ်နိုင်ငံထဲ ကိုလိုနီ နယ်ချဲ့ ခြင်းအစား နည်းဗျူဟာ တူရာနိုင်ငံများ မဟာမိတ်ပြုကာ ဘုံလုပ်ငန်းစဉ်များချမှတ်လျက် ပူးတွဲ လုပ်ဆောင်မှုများ လုပ်ကိုင်လာနေကြသည် ။ အမေရိကန် အပါအ၀င် နိုင်ငံပေါင်းစုံ မဟာမိတ်တပ်များ၏ အီရတ်နှင့် အာဖကန်နစ္စတန်နိုင်ငံများကို စစ်ရေးအရ ၀င်ရောက် စွပ်ဖက်မှုအား ကြည့်လျှင် ပြောင်းလဲလာသော စစ်ရေးအနေအထားကို သိသိသာသာ တွေ့ မြင်ရပေမည် ။

တခြားတစ်ဖက်တွင်လည်း ၀ါဒရေးရာ စစ်ပွဲများအစား အကြမ်းဖက်သမားများ နှိပ်နှင်းရေး ခေါင်းစီးအောက်တွင် လက်နက်ကိုင်တိုက်ပွဲများ အပါအ၀င် လက်နက်ဈေးကွက်သည်လည်း မသိမသာဖြစ်ထွန်းနေပေသည် ။ ထို့ ကြောင့် ကမ္ဘာ့ အင်အားကြီး နိုင်ငံများသည် ပထ၀ီ နိုင်ငံရေးအရ ခြေကုတ်ယူမှုများအပါအ၀င် စီးပွားရေးလုပ်ငန်းရပ်များကို ရေရှည်အကျိုးစီးပွားအတွက် လုပ်ငန်းစဉ်များ ချမှတ်ကာ သတိထားလုပ်ဆောင်လာကြသည်ကို ယနေ့ ကမ္ဘာမှာ တွေ့ ရပေမည် ။

စူပါ ပါဝါနိုင်ငံများ၏ စစ်ရေးမှ နောက်ကွယ် အကျိုးစီးပွားရပ်များကို လက်ငင်း မမြင်သာသော်လည်း သိသာထင်ရှားစွာဖြင့် တွေ့ မြင်ရသည်မှာ စစ်အသုံးစားရိတ်များဖြင့် စစ်ပမ်းပြီး တိုင်းပြည်သည် စီးပွားရေးသိသိသာသာ ကျဆင်းလာခြင်း ဖြစ်ပေသည်။ ထိုအခါ စီးပွားရေး မတည်မငြိမ် ဖြစ်နေသော တိုင်းပြည်မှ အနာဂတ်ဘ၀များ မသေချာသော လူထုသည် လက်ရှိအခြေအနေမှ အပြောင်းအလဲကို လိုလားတောင့်တနေသည်မှာ သဘာဝကျပေသည် ။ ၄င်း တိုင်းပြည်၏ စီးပွားပျက်အခြေအနေဆိုးမှ ရုန်းထွက်လိုသော အမေရိကန်လူထုကို တိုးတက်ကောင်းမွန်သောအပြောင်းအလဲ သို့ ပို့ ဆောင်ပေးမည်ဟု ကြွေးးကြော်မှုနှင့် သမ္မတ သက်တမ်း ( ၂ )ကြိမ်တိုင် ရွေးချယ်တင်မြောက်ခံရသော အမေရိကန် သမ္မတ အိုဘားမားသည် ပြုပြင်ပြောင်းလဲရေးကို အထူးလိုလားသူဖြစ်ပေသည် ။

အမေရိကန် နိုင်ငံတွင်း ပြုပြင် ပြောင်းလဲရေးကိုသာမက ကမ္ဘာ့စစ်ရေး ၊ စီးပွားရေး အရအပြောင်းအလဲ အချို့ ကိုပါ လက်တွေ့ ဆောင်ရွက် လိုပုံရပါသည် ။ အထူးသဖြင့် အိုဘားမားအနေဖြင့် လတ်တလောတွင် အမေရိကန်နှင့် စီးပွားရေး ကုန်သွယ်ဖက် တရုတ်နိုင်ငံ၏အရေးပါမှုသည် အဓိကထားစဉ်းစားရမည့် အကြောင်းတရပ်ဖြစ်လာပေသည် ။ ၂၀၁၀ စီးပွားရေးစစ်တမ်းအရ အမေရိကန်မှ တရုတ်ပြည်တွင် တိုက်ရိုက် ရင်းနှီးမြုပ်နှံမှု (U.S. foreign direct investment ) (FDI) မှာ $60.5 billion ရှိပြီး ၂၀၀၉ ခုနှစ်နှင့် နှိုင်းယှဉ်ပါက ၂၁.၄% မြင့်တက်လာခြင်းဖြစ်ပေသည် ။တရုတ်ပြည်မှ USA တွင် တိုက်ရိုက် ရင်းနှီးမြုပ်နှံမှု( China FDI in the United States )မှာ $3.2 billion ရှိပြီး ၂၀၀၉ ခုနှစ်နှင့် နှိုင်းယှဉ်ပါက ၁၇၁.၆% မြင့်တက်လာခြင်းဖြစ်ပေသည် ။ ထိုကဲ့သို့ အမေရိကန်နှင့် တရုတ် နိုင်ငံတို့ ၏ စီးပွားရေး ရင်းနှီးမြုပ်နှံမှုများ သိသိသာသာ တိုးတက်လာမှုသည် အမေရိကန် သမ္မတ အိုဘားမား၏ တရုတ်နိုင်ငံ၏ အိမ်နီးချင်းနိုင်ငံဖြစ်သော မြန်မာနိုင်ငံအပေါ် စိတ်ဝင်စားမှုများ တစ်နည်းတဖုံ အမှန်တစ်ကယ် ရှိပေလိမ့်မည် ။ အမေရိကန်အပါအ၀င်အနောက်အုပ်စုမှ မြန်မာပြည်အပေါ် စီးပွားရေး ဒဏ်ခတ်ပိတ်ဆို့ မှုလုပ်ဆောင်ထားသော ကာလတစ်လျှောက်လုံး မြန်မာပြည်မှ ပေါကြွယ်ဝသော သံယံဇာတများကို တရုတ်မှ အပြိုင်အဆိုင်မရှိ မောင်ပိုင်စီးခွင့်ရခဲ့ပေသည် ။

လူ့ အခွင့်အရေးချိုးဖောက်မှုတွေ ပြည့်နှက်နေသော မြန်မာစစ်အစိုးရကို တရုတ်မှ အကာအကွယ်ပေးခဲ့ပြီး တစ်ဖက်တွင်လည်း စစ်လက်နက်များရောင်းယုံမက ပွင့်လင်းမြင်သာမှုမရှိသော စီးပွားရေးရင်းနှီးမြုပ်နှံလျက် တရုတ်ခေါင်းဆောင်ပိုင်းနှင့် မြန်မာစစ်ခေါင်းဆောင်များပါ တူတာတွဲလုပ်ပြီး သိသိသာသာ ဖောက်ပြန် လာဘ်စားခဲ့ကြကြောင်း ယနေ့ အပြောင်းအလဲကာလ၌ ဘူးပေါ်သလို ပေါ်နေပေသည် ။ ထိုအချိန်တွင် မြန်မာ့ဒီမိုကရေစီ ခေါင်းဆောင်ဒေါ်အောင်ဆန်းစုကြည်အပါအ၀င် မြန်မာအတိုက်အခံ အင်အားစုများသည် တိုင်းပြည်နှင့် လူထု၏ ဆင်းရဲ မွဲတေ ခြွတ်ခြုံကျမှုအပါအ၀င် တိုင်းပြည်နှင့် လူထု၏ အနာဂတ် အကျိုးစီးပွားကို ထည့်တွက်ကာ ထိပ်တိုက်ရင်ဆိုင်ရေးလမ်းစဉ်အစား တူတာတွဲလုပ်မည့် အမျိုးသားပြန်လည် သင့်မြတ် ရင်ကြားစေ့ရေးလမ်းကြောင်းကို ရွေးချယ်ခဲ့ပေသည် ။

တရုတ်ကြီးအနေဖြင့်လည်း ၄င်းတို့ တိုင်းပြည်၏စီးပွားရေးကို နည်းလမ်းပေါင်းများစွာဖြင့် ကျားကန်ပေးနေသော မြန်မာပြည်တွင် ရေကာတာများ ၊ သဘာဝဓာတ်ငွေ့ ပိုက်လိုင်းအပါအ၀င် အနာဂတ်အကျိုးစီးပွားများကို မြင်ပြီး မြန်မာပြည်၏ နိုင်ငံရေးတည်ငြိမ် ငြိမ်းချမ်းရေးကို လိုလားကောင်း လိုလားပေလိမ့်မည် ။ ဆိုလိုသည်မှာ မြန်မာပြည်တွင် စစ်မှန်သောပြည်တွင်း ငြိမ်းချမ်းရေးမရှိပါက တရုတ်နိုင်ငံသို့ သွယ်တန်းသော ပိုက်လိုင်းနှင့် တရုတ်ပြည်သို့ ရေအားလျှပ်စစ်ထုတ်လုပ်ပေးနေသော မြန်မာပြည်မှ ရေကာတာများအား အနာဂတ်တွင် ဖောက်ခွဲဖျက်ဆီးမှုများရှိလာပါက တရုတ်တို့ ၏ အကျိုးစီးပွားကို သွယ်ဝိုက်၍ ဖြစ်စေ ၊ တိုက်ရိုက်ဖြစ်စေ ထိခိုက်နိုင်ပေသည် ။ တရုတ်၏ အကျိုးစီးပွားကို ထိခိုက်ခြင်းသည် တနည်းတဖုံ အမေရိကန်အကျိုးစီးပွားကို အနာဂတ်မှာ ထိခိုက်လာနိုင်စရာ အကြောင်းရှိပေသည် ။ အဘယ်ကြောင့်ဆိုသော် ကမ္ဘာပေါ်တွင် တရုတ်နိုင်ငံသည် အမေရိကန်၏ တတိယအများဆုံး ပို့ ကုန်ပို့ သောနိုင်ငံတစ်နိုင်ငံဖြစ်ပြီး ပို့ ကုန်ငွေတန်ဖိုးမှာ ၂၀၁၁၌ $103.9 billion ဖြစ်ကာ ၂၀၁၀ ထက် ၁၃.၁% ( ($12.0 billion) မြင့်ကာ အမေရိကန်မှ တရုတ်ပြည်သို့ ပို့ ကုန်မှာ၂၀၀၀ခုနှစ်ထက် 539% မြင့်တက်ခဲ့ပေသည် ။ ထို့ ပြင်တရုတ်နိုင်ငံ၏ အမေရိကန်တွင် တိုက်ရိုက်ရင်းနှီးမြုပ်နှံမှု၏ အကျိုးဆက်အဖြစ် အမေရိကန်ပြည်သူပြည်သားများအတွက် အလုပ်အကိုင် ၂၇၀၀၀ ကျော် ဖန်တီးပေးနေကြောင်း စာရင်းအင်းများက ဖော်ပြနေပေသည် ။

ထို့ ကြောင့် အိုဘားမားသည် မြန်မာ ၊ ထိုင်း ၊ ကမ်ဘောဒီးယားနိုင်ငံများ၏ခရီးစဉ်ကို လက်ခံခဲ့သော်လည်း တရုတ်နိုင်ငံ၏စိတ်ကွက်မှုနှင့်အတူ အငြိအစွန်းဖြစ်နိုင်သော ဗီယက်နမ်နိုင်ငံ၏ ဖိတ်ကြားချက်ကို ငြင်းပယ်ခဲ့ပေသည် ။ အမေရိကန်စစ်တပ်၏ စစ်ရေးလေ့ကျင့်မှုကို လေ့လာရန်အတွက် မြန်မာစစ်တပ်ကို ဖိတ်ကြားခြင်းသည် အနာဂတ်တွင် စစ်ရေးသာမက လူ့ အခွင့်အရေးကို စစ်တပ်မှ လေးစားလိုက်နာရန် လေ့ကျင့်သင်ကြားပေးနိုင်ကောင်း ပေးနိုင်လိမ့်မည်ဟု မျှော်လင့်ရပါသည် ။

မည်သို့ ပင်ဖြစ်စေကာမူ တရုတ်နှင့် အမေရိကန်သည် ပထ၀ီနိုင်ငံရေးအရ မြန်မာပြည်ကို အထူးတလည် စိတ်ဝင်စားနေချိန်တွင် လာဘ်ပေးလာဘ်ယူငွေများဖြင့် ကျိကျိတက်ချမ်းသာနေသော စစ်ဗိုလ်ချုပ်အိုများသည်လည်း စီးပွားရေးပိတ်ဆို့ မှုများရုတ်သိမ်းခြင်း၏ အကျိုးဆက်မှ ငွေမည်းများကို ငွေဖြူလုပ်သလို စိတ်အမဲ ( စိတ်အညစ်အကြေး )များကို ဖြူစင်အောင် ပြုပြင်ပြောင်းလဲရမည့် အချိန်အခါကောင်းလည်း ဖြစ်ပေတော့သည် ။ အိုဘားမားအနေဖြင့် လည်း မြန်မာပြည်၏ ယနေ့ အစိုးရနှင့် အတိုက်အခံကြားမှ အပြောင်းအလဲကို လိုလားကြောင်း ထိုင်းနိုင်ငံအရောက်တွင်ပြောကြားခဲ့ပေသည် ။

အိုဘားမား၏ မြန်မာပြည် ခရီးစဉ်မတိုင်မီ နိုင်ငံရေးအကျဉ်းသားများလွှတ်ပေးခဲ့သော်လည်း အဖမ်းဆီးခံ နိုင်ငံရေးအကျဉ်းသားများ ဆက်လက်ရှိနေခြင်းအပါအ၀င် ကချင်ပြည်တွင် စစ်ပွဲများရှိနေခြင်းသည် အနာဂတ် တိုင်းပြည်၏ ပြုပြင်ပြောင်းလဲရေးကို စိန်ခေါ်နေစဲဖြစ်ပေသည် ။ တနည်းအားဖြင့် အိုဘားမား၏ ခရီးစဉ်သည် အမေရိကန်ပြည်သူပြည်သားများလိုလားသော တိုင်းပြည်ငြိမ်းချမ်းရေးနှင့် ကမ္ဘာ့စီးပွားရေးအခွင့်အလမ်းများ အနာဂတ်တွင်လမ်းပွင့်လာရေးဖြစ်သလို လူ့ အခွင့်အရေးငတ်မွတ်နေသော မြန်မာပြည်သူလူထုအတွက် တရုတ်ရိုးရာ ဆေးမြီးတိုအစား အနောက်နိုင်ငံမှလာသော ခေတ်မီ အဖိုးတန်အားဆေးတစ်ခွက်လည်း ဖြစ်ပေသည် ။ မြန်မာပြည်အနေဖြင့် တရုတ်နှင့် အနီးကပ် ဆက်ဆံနေရာမှ အနောက်ဖက် လှည့်ကာ ကျားကွက်ရွေ့ လျက် အမေရိကန် သမ္မတ အိုဘားမားနှင့် လက်ဆွဲနှုတ်ဆက်မှုသည် ခုတစ်မျိုး တော်ကြာတစ်မျိုး တစ်ဇွတ်ထိုးလုပ်တတ်သော အတိတ်မှ စစ်ခေါင်းဆောင်များအပါအ၀င် လက်ရှိမြန်မာအစိုးရအား နောက်ပြန်မဆုတ်အောင် ကမ္ဘာကြီးသာမက ဒီမိုကရေစီကို ချစ်မြတ်နိုးသော မြန်မာပြည်သူများက မမှိတ်မသုန် စောင့်ကြည့်နေကြကြောင်း တင်ပြလိုက်ရပါသည် ။

အောင်ခိုင်မြင့်
၁၉ နိုဝင်ဘာ ၂၀၁၂

ရည်ညွှန်းကိုးကား ။ http://www.ustr.gov/countries-regions/china http://rhgroup.net/…/the-employment-impacts-of-chinese-inve


Oburma မှ လက်ဆွဲနှုတ်ဆက်လိုက်သော Burma ၏ အနာဂတ် ပြုပြင်ပြောင်းလဲရေး ( အပိုင်း ၂ )

၁၁ နိုဝင်ဘာလ ၂၀၁၄


၁၉၈၉ ခုနှစ် နိုဝင်ဘာလ၌ ဘာလင်တံတိုင်းကြီးပြိုကျပြီးချိန်မှ စတင်ကာ စစ်အေးခေတ်နောက်ပိုင်းတွင် ကမ္ဘာ့နိုင်ငံရေးသည် တမျိုးတဖုံပြောင်းလဲခဲ့သည်ဟု ဆိုရပေမည် ။အထူးသဖြင့် ဥရောပနိုင်ငံများတွင် လက်ဝဲ လက်ယာအားပြိုင်မှုများနေရာတွင် စီးပွားရေးပူးပေါင်းဆောင်၇ွက်ချက်များနေရာယူကာ ယခင်က စီးပွားရေးတံခါးပိတ်ထားသောနိုင်ငံများသည် နိုင်ငံရေး စီးပွားရေး ပြုပြင်ပြောင်းလဲမှုများလုပ်ဆောင်ခဲ့ပေသည် ။ ထိုသို့ သော ကမ္ဘာ့ နိုင်ငံရေးအခင်းအကျင်းတွင် အမေရိကန်သမ္မတ အိုဘားမားသည် မြန်မာပြည်၏ ပြုပြင်ပြောင်းလဲရေးအပေါ် အကောင်းမြင်စွာ ကမ္ဘာ့ အလယ် အထီးကျန်ခဲ့သော မြန်မာစစ်အစိုးရ တဖြစ်လဲ ဦးသိန်းစိန်အစိုးရနှင့် လက်စွဲနှုတ်ဆက်ကာ မြန်မာပြည်အား ကမ္ဘာ့နိုင်ငံရေး ဇာတ်ခုံပေါ်သို့ တွဲခေါ်ခဲ့ပေသည် ။

 သို့ သော် လက်ရှိမြန်မာပြည်၏ နိုင်ငံရေးအခြေအနေသည် ဘာလင်တံတိုင်းကြီး ပြိုကျခဲ့သည်မှာ ငွေရတုတိုင်ခဲ့သော်လည်း ဖောက်ပြန်သော အစိုးရအဆက်ဆက်တွင် တိုင်းပြည်သည်ဆင်းရဲမွဲတေလျက် ပြည်တွင်းစစ်ထဲနစ်မြုပ်ကာ မြန်မာပြည်သူများ ၊မိခင်များ ငိုကြွေးနေရစဲဖြစ်ပေသည် ။ လိမ်သောသူသည် အသက်ရှည်သည်ဟု ကမ္ဘာ့စာပေတွေထဲ မဖတ်ဘူးစေကာမူ မြန်မာပြည်တွင် ပြည်တွင်းစစ်နှင့်အတူ မုသားစကားပိုင်ရှင် စစ်အာဏာရှင်များ သက်ဆိုးရှည်ခဲ့သည် ။ အိုဘားမား၏ မြန်မာ့နည်းမြန်မာ့ဟန် ပြုပြင်ပြောင်းလဲရေးအပေါ် အကောင်းမြင်သူများရှိသလို အလောသုံးဆယ်နိုင်လွန်းသည်ဟု သုံးသပ်ဝေဖန်မှုများလည်း ရှိခဲ့ပါသည် ။ အဘယ်ကြောင့်ဆိုသော် မြန်မာအစိုးရသည် တိုင်းပြည်တွင် လူ့့အခွင့်အရေးချိုးဖောက်မှုများရှိနေစဲ ဖြစ်သလို စစ်အာဏာရှင်စနစ်ကို အသက်သွင်းထားသော ၂၀၀၈ ဖွဲ့ စည်းပုံ အခြေခံဥပဒေပြင်ဆင်ရေးအား အတိုက်အခံနှင့် လူထုမှတောင်းဆိုနေသော်လည်း လေးလံနှေးကွေးသော ခြေလှမ်းများဖြင့် ဖွဲ့ စည်းပုံပြင်ဆင်ရေးကို အကြောင်းအမျိုးမျိုးပြလျက် ဦးသိန်စိန်အစိုးရမှ ငြင်းဆန်နေစဲ ဖြစ်သောကြောင့် ဖြစ်ပါသည် ။

၂၀၁၂ ခုနှစ်တွင် မြန်မာပြည်သို့ ပထမအကြိမ် အလည်အပတ်ရောက်ရှိခဲ့ဘူးသော အမေရိကန်သမ္မတ အိုဘားမားသည် မြန်မာပြည်၏ ပြုပြင်ပြောင်းလဲရေး ကို အကောင်းမြင်လျက် မြန်မာပြည်အပေါ် စီးပွားရေးအရေးယူပိတ်ဆို့ မှုများကို ဖြေလျော့ခဲ့သော်လည်း လက်တွေ့ တွင်မူ စီးပွားရေးအကျိုးရလဒ်များသည် တိုင်းပြည်၏ပြည်သူလူထုထက် တိုင်းပြည်၏အာဏာပိုင်များ၊ အာဏာပိုင်များနှင့် နီးစပ်ရာ ခရိုနီများမှသာ အကျိုးရရှိနေကြောင်း သုံးသပ်ဝေဖန်မှုများ ထွက်ပေါ်နေပါသည် ။ ကမ္ဘာ့နိုင်ငံအသီးသီးသည် အမေရိကန်သမ္မတ များ အလည်အပတ်သွားလျှင် မည်သည့်အကူအညီများပေးလိမ့်မည်ဟု မျှော်လင့်သလို မြန်မာပြည်မှ သမ္မတများ နိုင်ငံတကာသို့ အလည်အပတ်သွားလျှင်မူ မည်သည့်အကူအညီများတောင်းခံမည်ဟု ထင်မှတ်နေခြင်းသည် သမိုင်းဖြစ်စဉ်များအရ သဘာဝကျသော အတွေးအခေါ်ဖြစ်ပါသည် ။

အဘယ်ကြောင့်ဆိုသော် အမေရိကန်သည် ချမ်းသာကြွယ်ဝလျက် လူ့ အခွင့်အရေးအား လေးစားလိုက်နာကာ မြန်မာပြည်တွင်မူ လက်တဆုပ်စာ အာဏာပိုင်များသာ ချမ်းသာကြွယ်ဝနေသော်လည်း ငတ်နေသော လူထုအတွက်ဆိုကာ လှည့်လည်တောင်းခံ ချေးငှားလျက် ရှိနေပေသည် ။ သို့ သော် မြန်မာပြည်သည် ဆင်းရဲမွဲတေကာ လူ့ အခွင့်အရေးချိုးဖောက်မှုများ မရေတွက်နိုင်အောင်ရှိနေသေးသောကြောင့် နိုင်ငံတကာမှ အပေါ်ယံ အပြောင်းအလဲ မြန်မာ့အရေးကို သတိကြီးစွာ လေ့လာ စောင့်ကြည့်နေရပေသည် ။

ယခုနှစ် မကြာမီလပိုင်းအတွင်းတွင် ကျင်းပပြုလုပ်သော ကုလသမဂ္ဂညီလာခံ၌ မြန်မာပြည်တွင် လူ့ အခွင့်အရေးချိုးဖောက်မှုများမရှိတော့ကြောင်း မြန်မာအစိုးရမှပြောဆိုဆွေးနွေးခဲ့သော်လည်း လက်တွေ့ တွင်မူ အလွတ်သတင်းထောက် ကိုပါကြီးအသတ်ခံရမှုအပါအ၀င် သတင်းထောက်များ၊ အတိုက်အခံနိုင်ငံရေးသမားများ ၊လယ်သမားများအား ဖမ်းဆီးထောင်ချမှုများရှိနေစဲဖြစ်သော်လည်း နိုင်ငံရေးအကျဉ်းသားမရှိတော့ကြောင်း မြန်မာအစိုးရမှ ဗြောင်လိမ်နေပေသေးသည် ။ လက်တွေ့ ပကတိအခြေအနေတွင်မူ တဖက်မှ ငြိမ်းချမ်းရေးဆွေးနွေးပွဲများ ပြုလုပ်ကာ အခြားတဖက်တွင်မူ စစ်ပွဲများဖြစ်ပွားနေသော မီးစတဖက် ရေမှုတ်တဖက် မြန်မာအစိုးရအပေါ် အမေရိကန်အစိုးရမှ ဆုပေးဒဏ်ပေး စနစ် မုန်လာဥတဖက် တုတ်တဖက် ("carrot or stick approach") နည်းဖြင့်ချဉ်းကပ်ခဲ့သော်လည်း နှစ်ပေါင်း ( ၆၀ )ကျော် ရေရှည်ပြည်တွင်းစစ်ဖြင့် ကမ္ဘာကျော်နေသောမြန်မာအစိုးရအဆက်ဆက်သည် နိုင်ငံတကာမှထောက်ပံ့သော မုန်လာဥလို အကျိုးစီးပွားများကို ရယူကာ ပြဿနာအား ငြိမ်းချမ်းစွာအဖြေမရှာပဲ တုတ်ဖြင့်ပြည်သူကို ရိုက်ယုံမက သေနတ်ဖြင့်ပါ ပစ်ခတ်နေပါသေးသည် ။

အမေရိကန်၏ စီးပွားရေးပိတ်ဆို့ မှုကို အခွင့်ကောင်းယူကာ တခြားတဖက်တွင် တရုတ်ပြည်မှ မြန်မာပြည်တွင် စီးပွားရေးခြေကုပ်ရယူနေမှုကိုလည်း အမေရိကန်မှမလိုလားပေ။ ထို့ ကြောင့် အမေ၇ိကန် အစိုးရမှ မြန်မာပြည်အပေါ် စီးပွားရေး ပိတ်ဆို့ မှုများ ဖြေလျော့ကာ ၂၀၁၂ နိုဝင်ဘာလတွင် အမေရိကန်သမ္မတ အိုဘားမားသည် မြန်မာပြည်သို့ ပထမဆုံး အကြိမ်လာရောက်လည်ပတ်ခဲ့ခြင်း ဖြစ်ပါသည် ။ မြန်မာပြည် ၏ စီးပွားရေးတိုးတက်မှုစစ်တမ်း လေ့လာသုံးသပ်ချက်အရ တိုင်းပြည် ၏ ဂျီဒီပီသည် ၂၀၁၂ တွင် ၅.၅% မှ ၂၀၁၃ တွင် ၆.၅ % ထိ တိုးတက်ခဲ့ခြင်းသည် မြန်မာပြည်အပေါ် စီးပွားရေး ဖြေလျော့ပြီးနောက် တိုင်းပြည်၏ ရေနံ အပါအ၀င်တခြားနိုင်ငံခြားပို့ ကုန်များနှင့်  နိုင်ငံခြားရင်းနှီးမြုပ်နှံ မှုများကြောင့် ဖြစ်သည်ဟုဆိုပါသည် ။ ၂၀၁၃ နှင့် ၂၀၁၄ စီးပွားနှစ်တွင်ေ၇နံကို တွန်းပို့ ရာမှ US$ 3.207 ဘီလီလျံ၇ရှိခဲ့ပြီး ယခုနှစ် ၂၀၁၄ တွင် ယခင်နှစ်များထက် နိုင်ငံခြားရင်းနှီးမြုပ်နှံမှုသည် ၅ ဘီလီယံ ( $5 billion )ကျော်မည်ဟု ခန့် မှန်းထားပေသည် ။ မြန်မာပြည်တွင် နိုင်ငံတကာမှ ရင်းနှီးမြုပ်နှံမှု၌ တရုတ်နိုင်ငံသည် ၂၀၁၃-၂၀၁၄ ခုနှစ်အတွင်း US$ 14 billion ဖြင့် ပထမနေရာတွင်ရှိပြီး ထိုင်းနိုင်ငံသည် US$ 10 billion ကျော်ဖြင့် ဒုတိယလိုက်ပါသည် ။ထို့ ကြောင့်အမေရိကန်သည် မြန်မာပြည်၌ စီးပွားရေးရင်းနှီးမြုပ်နှံမှုတွင် အားကျမခံဖြစ်လျက် US$ 1 billion တန်ဖိုးရှိသော စာချုပ်ကို ချုပ်ဆိုကာ US ကုမ္မဏီ GE (General Electric )မှ ဘိုးအင်း ၇၃၇ လေယာဉ် ၁၀စီးကို မြန်မာ့လေကြောင်းသို့ ၂၀၁၅ ဇွန်လတွင် စတင် ငှားယမ်းကာ အမေရိကန်၏ အကြီးမားဆုံးသော ရင်းနှီးမြုပ်နှံမှုကို စတင်ပေတော့မည် ။

သို့ ဖြစ်၍ မြန်မာ့အရေးသည် အင်အားကြီးနိုင်ငံများ၏ စီးပွားရေးကျားကွက် နိုင်ငံရေးကစားကွက်များပြည့်နှက်လျက် ပထ၀ီနိုင်ငံရေးအား မျက်ခြေမပြတ်ကာ အတိုက်အခံခေါင်းဆောင် ဒေါ်အောင်ဆန်းစုကြည်သည် အမေရိကန်သို့ အလည်အပတ်သွားသကဲ့သို့  တရုတ်နိုင်ငံသို့ သွားရောက်မည့် အလည်အပတ်ခရီးစဉ်သည် သဘာဝကျလျက် တရုတ်နှင့်လည်း အနာဂတ်အတွက် ဆက်ဆံထားသင့်ပေသည် ။ လက်တွေ့ တွင်မူ တိုင်းပြည်၏ ရေနံ လုပ်ငန်း ၊ဆက်သွယ်ရေးလုပ်ငန်းများအပါအ၀င် တိုင်းပြည်၏ စီးပွားရေးလုပ်ငန်းကြီးများကို စစ်တပ်ကျောထောက်နောက်ခံထားသော အစိုး၇မှ လက်ဝါးကြီးအုပ်ထားစဲဖြစ် သည်။ ထို့ ပြင်တိုင်းပြည်၏ နှစ်စဉ် ၀င်ငွေများသည် စာရင်းအင်းမရှိ ပျောက်ခြင်းမလှပျောက်ကာ လူထု၏ ကျန်းမာရေး ပညာရေးလုပ်ငန်းများတွင်လည်း မသုံးစွဲပဲ စစ်အသုံးစားရိတ်ဟု အကြောင်းပြကောင်းအောင် ပြည်တွင်းစစ်ကို မရပ်တန့် ခြင်းလားဟု မေးခွန်းထုတ်၇ပေတော့မည် ။

 နိုင်ငံတကာ၏ သုံးသပ်မှုသည် မြန်မာပြည်၏ နိုင်ငံရေးပြုပြင်ပြောင်းလဲမှုသည် စီးပွားရေးပြုပြင်ပြောင်းလဲရေးနှင့်တိုက်ရိုက်အချိုးကျသော်လည်း မြန်မာအစိုးရသည် အာဆိယံဥက္ကဌရာထူးကို ရယူကာ တိုင်းပြည်နှင့် ပြည်သူလူထု ကောင်းရာကောင်းကျိုးထက် အာဏာပိုင်များကြီးပွားရာ ကြီးပွားကြောင်း လုပ်ကိုင်နေမှုအပေါ် နိုင်ငံတကာမှ စိုးရိမ်နေသော လေသံများ ဖြစ်ပေါ်နေပါသည် ။ မြန်မာပြည်၏ ပြုပြင်ပြောင်းလဲရေးသည် နိုင်ငံရေး တွင်သာမက စီးပွားရေးတွင်လည်းအလျင်အမြန်ပြောင်းလဲလာမည်ဟု မဆိုသာသည့် အပြင် ယခုအခါ နိုင်ငံရေးပြုပြင်ပြောင်းလဲရေးတွင် ရပ်တန့် နေပြီလားဟု သုံးသပ်မှုများ ထွက်ပေါ်နေပါသည်။

မြန်မာနိုင်ငံမှာကျင်းပမည့် အရှေ့အာရှ ထိပ်သီး ညီလာခံ ကို မစ္စတာ အိုဘားမား တက်ရောက်စဉ်တွင် လွှတ်တော်တွင်း လွှတ်တော်ပြင်ပ ရှိအတိုက်အခံ ဒီမိုကရေစီ အင်အားစုများမှလည်း တိုင်းပြည်၏ လက်ရှိအပြောင်းအလဲ ဖြစ်ရပ်မှန်များကို အမေရိကန်သမ္မတ အိုဘားမားအပါအ၀င် နိုင်ငံတကာသို့  တင်ပြကာ နိုင်ငံတကာမှ မြန်မာပြည်အပြောင်းအလဲအပေါ် မည်သို့ လုပ်ဆောင်သင့်ကြောင်း အကြံဥာဏ်များ ပေးနိုင်မည်ဟု မျှော်လင့်ရပါသည် ။ ယခင် စက်မှု ၁ ၀န်ကြီးဟောင်း ယခု တောင်သာမြို့နယ် ပြည်သူ့လွှတ်တော်ကိုယ်စားလှယ် ဦးအောင်သောင်းအား အမေရိကန် မှ black list နာမည်ပျက်စာရင်းထဲ ထည့်သွင်းခဲ့မှုအပေါ် လွှတ်တော်တခုလုံး ဆတ်ဆတ်ထိမခံဖြစ်နေပေမဲ့ အလွတ်သတင်းထောက်ကိုပါကြီး ရက်ရက်စက်စက်အသတ်ခံရမှုကို ရေငုံနှုတ်ပိတ်နေသော လွှတ်တော်သည် အနာဂတ်မြန်မာပြည်အတွက် ကောင်းကျိုးများ သယ်ပိုးလိမ့်မည်ဟု ထင်မြင်ယူဆသူများ အလွန်အမင်းနည်းပါးလျက်ရှိပါသည် ။

တရုတ်ကို ကြောက်သော မြန်မာအစိုးရနှင့် လွှတ်တော်သည် ဖြစ်နိုင်လျှင် အိုဘားမားအပါအ၀င် ကမ္ဘာကြီးကို ထမင်းတစ်နပ်လျော့စားခိုင်းကာ အာဆီယံဥက္ကဌလုပ်နေသော သူတို့ ကို ကူညီထောက်ပံ့ဖို့ နားပူနားဆာ လုပ်မည့် အစီအစဉ်များ ရှိပုံရပါသည် ။ မည်သို့ ပင်ဆိုစေကာမူ မြန်မာပြည်ကို အပြုသဘောဆန်ကာ ချဉ်းကပ်သော ( ၂ )ကြိမ်ဆက်တိုက်အနိုင်ရသည့် အမေရိကန်သမ္မတ အိုဘားမား၏ သက်တမ်းသည် ( ၂ )နှစ်သာ ကျန်တော့သလို နောက်လာမည့် အမေရိကန်သမ္မတရွေးကောက်ပွဲတွင် ဒိမိုကရက်တစ်ပါတီမှ သမ္မတအဖြစ်ရွေးချယ်ခံရမှုသည် အမေရိကန်နိုင်ငံရေးတွင် အရေးတကြီးစောင့်ကြည့်ရမည် ဖြစ်သော်လည်း မြန်မာပြည်အပေါ် အမေ၇ိကန်အစိုးရ၏ထားရှိသော မူဝါဒသဘောထားသည် ယခုလို ပျော့ပြောင်းနေရမှ တင်းမာမှုများဖြစ်ပွားလာနိုင်မှုသည် မြန်မာအစိုးရ၏ ပြုပြင်ပြောင်းလဲရေး လုပ်ရပ်အပေါ်တည်မှီနေပေသည် ။

 မြန်မာပြည်၏ လာမည့် ၂၀၁၅ ရွေးကောက်ပွဲတွင် လူကြိုက်များသော လူထုဒီမိုကရေစီခေါင်းဆောင် ဒေါ်အောင်ဆန်းစုကြည်အား သမ္မတဖြစ်ခွင့် ကို တားဆီးထားသော ဥပဒေအပါအ၀င် ၂၀၀၈ ဖွဲ့ စည်းပုံ ဥပဒေပြင်ဆင်ရေးအား အမေရိကန် အပါအ၀င် နိုင်ငံတကာမှ မှ မည်သို့ ဖိအားပေးနိုင်မည်နည်း ။ ဦးသိန်းစိန်အစိုးရ၏ ကျန်ရှိသော သမ္မတသက်တမ်း တနှစ်ကျော်တွင် တိုင်းပြည်၏ ငြိမ်းချမ်းရေးအခြေခံအုတ်မြစ်ကို ချကာ အပစ်အခတ်ရပ်စဲရေးကို အောင်မြင်စွာ လုပ်ဆောင်နိုင်မည်လား ၂၀၁၅ ရွေးကောက်ပွဲသည် လွတ်လပ်ပြီး တရားမျှတမည်လား မေးခွန်းများစွာဖြင့် မြန်မာ့အရေးကို အိုဘားမားအပါအ၀င် ကမ္ဘာကြီးက ရင်လေးစွာ စောင့်ကြည့်နေစဲဖြစ်ပေသည် ။အမေရိကန်သမ္မတ အိုဘားမားသည် မြန်မာပြည်ကို အလာကောင်းပေမဲ့ အခါမနှောင်းစေချင်ပါဟု လူထုကိုယ်စား မျှော်လင့်ခြင်း တံခါးများ ဖွင့်ကာ ကြိုဆိုနေပါသည် ။

 အောင်ခိုင်မြင့်
၁၁ နိုဝင်ဘာလ ၂၀၁၄

 ရည်ညွှန်းကိုးကား http://www.networkmyanmar.org/index…/business-and-investment http://carnegietsinghua.org/publications/?fa=54299

 

No comments: