Wednesday, September 28, 2016

ကချင် ရေအားလျှပ်စစ် စီမံကိန်းသစ် ကန့်ကွက်စာ သမ္မတထံ ပေးပို့

ကချင် ရေအားလျှပ်စစ် စီမံကိန်းသစ် ကန့်ကွက်စာ သမ္မတထံ ပေးပို့
Wednesday, September 28, 2016
ကချင်ပြည်နယ် ချီဖွေနှင့် ဆော့လော် မြို့နယ်အတွင်းရှိ မေခမြစ်နှင့် ငေါ်ချန်းခ ချောင်းအပေါ်တွင် တည်ဆောက်မည့် ရေအားလျှပ်စစ် စီမံကိန်းများကို ကန့်ကွက်ကြောင်း ဒေသခံများက နိုင်ငံတော် သမ္မတ ထံသို့ အိတ်ဖွင့်ပေးစာ ပေးပို့ လိုက်သည်ဟု သတင်းရရှိသည်။
မေခမြစ်၊ ငေါ်ချန်းခ ရေအားလျှပ်စစ် စီမံကိန်းနှင့် ပတ်သက်၍ ချီဖွေ၊ ဆော့လော်မြို့နယ်မှ ရပ်မိရပ်ဖ ၇၇ ဦးက ဒေသခံ များနှင့် အလုပ်ရုံဆွေးနွေးပွဲ တရပ်ကို စက်တင်ဘာလ ၂၂ ရက်နှင့် ၂၃ ရက်တွင် ပြုလုပ်ခဲ့ပြီး ရပ်ဆိုင်းပေး ရန်နှင့် ကန့်ကွက် သည့် သဘောထား ထုတ်ပြန်ချက်နှင့် အိတ်ဖွင့်ပေးစာကို နိုင်ငံတော်သမ္မတထံ ပေးပို့ခဲ့ခြင်း ဖြစ်သည်ဟု သိရသည်။
ကချင် ရပ်ရွာဒေသ ဖွံ့ဖြိုးရေး အသင်း ပြောရေးဆိုခွင့်ရှိသူ ဦးမုန်ရာက “ဒီစီမံကိန်းကို နယ်ခြားစောင့်တပ်က စခုန်တိန့်ယိန်း တို့ စခုန်ယိန်းဆောင်တို့ ဦးစီးမယ်လို့ သိရတယ်။ အရင် စစ်အစိုးရနဲ့ တရုတ်ကုမ္ပဏီတွေက စာချုပ် ချုပ်ပြီးသား ဖြစ်နေ တယ်။ ဒီဆည်တွေ ဆောက်ရင် ဒေသခံတွေရဲ့ တောင်စောင်း အ်ိမ်တွေ လယ်တွေ အကုန်ရေမြုပ် မယ်။ သူတို့က စဖို့ စီစဉ်နေတယ်။ ဒါ့ကြောင့် ကန့်ကွက်ကြတာပါ”ဟု ပြောသည်။
ငေါ်ချမ်းခ ချောင်းရိုးတလျှောက်တွင် ကျေးရွာပေါင်း ၆၈ ရွာ အနည်းဆုံးရှိပြီး လူဦးရေ ၃၀၀၀၀ ကျော် မှီတင်း နေထိုင် လျက် ရှိကြောင်း၊ ဒေသခံများမှာ ဘိုးဘွားစဉ်ဆက်က လုပ်ကိုင်ခဲ့သည့် လှေခါးထစ် တောင်ယာ စိုက်ပျိုးရေး နှင့် ဥယျာဉ် ခြံမြေများ လုပ်ကိုင်ကြကြောင်းလည်း သမ္မတထံသို့ ပေးပို့သည့် စာတွင် ရေးသားထားသည်။
ရပ်မိရပ်ဖ တဦးလည်းဖြစ်သူ ဦးမုန်ရာက“ကျနော်တို့ဒေသခံတွေရဲ့ တောင်စောင်းရွာတွေ အိမ်တွေက ဆည်ဆောက် တာနဲ့ ရေလွှမ်းသွားမှာ။ အခြားကို ပြောင်းရွှေ့နေဖို့ ဆိုတာက မြစ်ကြောင်းအထက်ပိုင်းမှာက ကျောက်ဆောင်တွေပဲ ဆိုတော့ နေထိုင်ဖို့ မလွယ်ဘူး ဖြစ်နေပါတယ်”ဟုလည်း ပြောသည်။
ချီဖွေ၊ ဆော့လော်ဒေသခံများသည် မေခမြစ်ကို မျက်နှာမူ၍ ငေါ်ချန်းခချောင်းကို ကျောပေးကာ အိမ်များ ဆောက် လုပ် ပြီး မြစ်ကြောင်း၊ ချောင်းရိုးတလျောက် နေထိုင်ကြသည်ကို တွေ့ရသည်။
ဒေသခံ ရပ်မိရပ်ဖများ စုံစမ်းချက်အရ ၎င်းတို့ ဒေသတွင် ရေအားလျှပ်စစ် စီမံကိန်းအတွက် ဆည် ၄ ခုခန့် တည် ဆောက် ရန် စီစဉ်နေကြောင်း သိရှိရသည်။
ချီဖွေ၊ ဆော့လော် ဒေသခံများသည် လိမ္မော်သီး၊ သစ်ကြားသီး၊ ချဉ်ဆော်ကားသီး စသည့် နှစ်ရှည်သီးနှံပင်များကို တောင် များပေါ်တွင် လှေကားထစ်စိုက်ပျိုးရေးအဖြစ် လုပ်ကိုင်ကြပြီး အိမ်တွင်း ဝမ်းစာအတွက် တောင်ယာစပါး စိုက် ပျိုး ကြသည်။
ရေအားလျှပ်စစ် စီမံကိန်း ပြုလုပ်မည့် နယ်မြေသည် ကချင် မျိုးနွယ်စုများတွင် ပါဝင်သည့် လော်ဝေါ်၊ လချိဒ်၊ ငေ့ါချန်း နှင့် လီဆူမျိူးနွယ်စုများ နေထိုင်ပြီး အဆိုပါ မျိုးနွယ်စုများ၏ သမိုင်းကြောင်းအရ တန်ဖိုးကြီးသည့် နယ်မြေ ဖြစ်ကြောင်း၊ လွန်ခဲ့သည့် နှစ်ပေါင်း ၁၂၀၀ ကျော်က ငေါ့ချမ်းမျိုးနွယ်စုများ စတင် ဆင်းသက်နေထိုင်လာသည့် သမိုင်းဝင် နယ်မြေ ဖြစ်ကြောင်း သိရသည်။
ထို့ကြောင့် ၎င်းတို့ နေထိုင်ရာ နေရာများမှ ရွှေ့ပြောင်းလိုခြင်း မရှိသကဲ့သို့ ဒေသခံများကို ရှင်းလင်း ပြောပြခြင်း တစုံ တရာ မရှိသည့် ရေအားလျှပ်စစ် စီမံကိန်းကို လိုလားခြင်း မရှိဟုလည်း ဦးမုန်ရာက ပြောသည်။
၂၀၁၅ ခုနှစ်အတွင်းကလည်း ချီဖွေမြို့နယ် နှင့် ဆော့လော်မြို့နယ်အတွင်း နေထိုင်ကြသည့် ဒေသခံများ၏ လှေကား ထစ် တောင်ယာ စိုက်ခင်းများကို စီမံကိန်းဧရိယာအတွင်း ဝင်နေသည်ဟု ဆိုကာ ဒေသ အာဏာပိုင်များက ဖယ်ရှား ခိုင်းခြင်း၊ တချို့နေရာများတွင် တောင်ယာများ ဆက်လက်စိုက်ပျိုးခွင့်မပြုဘဲ အာဏာပိုင်များက ပိတ်ပင် လိုက်ခြင်း များ ပြုလုပ်ခဲ့သည်ကို ဧရာဝတီက အဆိုပါ ဒေသအတွင်း သွားရောက်ခဲ့ရာတွင် စုံစမ်း သိရှိရသည်။
ချီဖွေ နှင့် ဆော့လော်မြို့နယ်သည် မြေပြန့်မရှိဘဲ တောင်ထူထပ်သည့် တောင်ပေါ်ဒေသဖြစ်ပြီး ဒေသခံများ ဘိုးဘွား စဉ်ဆက်အလိုက် စိုက်ပျိုးလုပ်ကိုင်နေသည့် တောင်ယာများသာ မြေသားတောင်များရှိသည်။
တောင်အများစုသည် ကျောက်တောင်များ၊ သတ္တုထွက်သည့် တောင်များ ဖြစ်ပြီး တရုတ်နိုင်ငံသားတချို့က သတ္တု တူး ဖော်ရေး လုပ်ကိုင်နေသည်ကိုလည်း တွေ့ခဲ့ရသည်။
ဒေသခံတဦးဖြစ်သူ ဦးဒေါင်ခေါန်ကလည်း “ဘိုးဘွားစဉ်ဆက် စိုက်လာတဲ့ နေရာမှာ အခြားနေရာကို အစားထိုးပေးတာ တွေ လုပ်တယ်။ ပေးတဲ့နေရာက ကျောက်တောင်တွေ လူနေလို့ မရ၊ စိုက်စားလို့မရ တချို့နေရာတွေကလည်း တောင် တခုလုံး ပြန်ရှင်းရမယ်ဆိုတော့ ဘယ်လိုမှ မဖြစ်နိုင်ဘူး”ဟု ပြောဆိုသည်။
သို့သော် ၎င်းတို့ ဒေသခံများအနေဖြင့် နယ်ခြားစောင့် တပ်ဖွဲ့ဝင်များကို ပြန်လည် ငြင်းခုံရန် ကြောက်ရွံ့သည်ဟုလည်း ဦးဒေါင်ခေါန်က ရှင်းပြသည်။
“ကျနော်တို့အတွက် ငေါ်ချန်းခ မရှိရင် သောက်စရာရေက အစ ခက်ခဲသွားနိုင်သလို ကျနော်တို့ သမိုင်းလည်း ပျောက် သွားမှာ။ နောက်ပြီး ဆည်ဆောက်ရင်လည်း နေတဲ့ နေရာတွေက ရေလွှမ်းသွားမှာ။ ကျနော်တို့ ပြောင်းပေးရမယ်တဲ့။ ဒါတွေ ကျနော်တုိ့ မလုပ်နိုင်ဘူး”ဟု ဦးဒေါင်ခေါန်က ဆက်ပြောသည်။
ချီဖွေ နှင့် ဆော့လော်မြို့နယ်တို့မှာ ဦးစခုန်တိန့်ယိန်း ဦးဆောင်သည့် ကချင်နယ်ခြားစောင့်တပ် ထိန်းချုပ်ရာ အထူး ဒေသ (၁) အတွင်းမှ မြို့နယ်များ ဖြစ်သည်။
အဆိုပါ အထူးဒေသ (၁)သည် အစိုးရ၏ အုပ်ချုပ်ရေးအာဏာ သက်ရောက်မှုမရှိဘဲ ဦးစခုန်တိန့်ယိန်း၏ နယ်ခြားစောင့် တပ်၊ တပ်မတော်တို့က အာဏာသက်ရောက်သည့် နယ်မြေဖြစ်ကြောင်း သိရသည်။
ထို့အပြင် ဦးစခုန်တိန့်ယိန်းက နာယက အဖြစ် ပါဝင်ပြီး ဒေသခံများ မဝင်မနေရ စနစ်ဖြင့် ဖွဲ့စည်းထားသည့် ပြည်သူ့စစ် တပ်ဖွဲ့လည်း ရှိသည်။
ယခု ငေါ်ချန်းခ ရေအားလျှပ်စစ် စီမံကိန်း ဒေသသည် လမ်းပန်းဆက်သွယ်ရေး ခက်ခဲပြီး သွားလာရန် တောလမ်း၊ မြေကြီး လမ်းသာရှိပြီး ဖုန်းလိုင်းများလည်း မမိပါ။ ဒေသခံ မဟုတ်သည့် အပြင်လူ သွားလာရန် ခက်ခဲသည့် ဒေသ ဖြစ်သည်။
အဆိုပါ ဒေသတွင် အာဏာပိုင်များ၏ ခွင့်ပြုချက်ဖြင့်ဟုဆိုကာ တရုတ်ကုမ္ပဏီတချို့က သတ္တုတူးခြင်း၊ စကျင် ကျောက် တောင်များကို တူးခြင်းများ လုပ်ကိုင်လျက် ရှိသည်ကိုလည်း မြင်တွေ့ခဲ့ရသည်။
ထို့အပြင် ၂၀၁၄ ခုနှစ်ကလည်း တရုတ်ကုမ္ပဏီများက သတ္တုတူးခြင်းများ လုပ်ကိုင်ပြီး စွန့်ပစ် အညစ်အကြေး များကို ငေါ့ချန်းခ ချောင်း အတွင်း စွန့်ပစ်ခဲ့သဖြင့် ချောင်းအတွင်းရှိ ငါးများ သေဆုံးခြင်း၊ ချောင်းရေ ညစ်ညမ်းသွားခြင်း၊ ချောင်း ရေ ပြန်လည် ကြည်လင်လာသော်လည်း အနံများရှိနေခြင်း တို့ကြောင့် ဒေသခံများ သောက်သုံးရေ နှင့် ဟင်းစား ငါးများ ဖမ်းဆီးရန် အခက်အခဲ ဖြစ်သွားခဲ့ကြောင်း သိရသည်။
၂၀၁၅ ခုနှစ် နှစ်ကုန်ပိုင်းကလည်း ဆည်တည်ဆောက်ရန် တရုတ်အင်ဂျင်နီယာများ လာရောက်ပြီး လုပ်ငန်းစီစဉ်ရန် လုပ်ဆောင်ခဲ့သော်လည်း ဒေသခံများက အင်အားဖြင့် ဆန္ဒပြမှုများ တားမြစ်မှုများ ပြုလုပ်ခဲ့သဖြင့် ပြန်သွားခဲ့သည်ဟု ဆိုသည်။
အဆိုပါ ကိစ္စရပ်များနှင့် ပတ်သက်၍ ဦးစခုန်တိန့်ယိန်းကို ဧရာဝတီက ဆက်သွယ်မေးမြန်းရာ ဒေသခံများ၏ လုပ်ဆောင် ချက်များကို မသိရှိကြောင်း၊ ရေအားလျှပ်စစ် တည်ဆောက်မည့် ကိစ္စကိုလည်း ၎င်းအနေဖြင့် မသိရှိ ကြောင်း၊ မြန်မာနိုင်ငံ နယ်နိမိတ်အတွင်း ရေအားလျှပ်စစ် တခုခု တည်ဆောက်မည်ဆိုပါက အတတ်ပညာရှင်များနှင့် ဗဟိုအစိုးရကသာ ဆုံးဖြတ်လိမ့်မည် ဖြစ်ကြောင်း ပြောသည်။
ဦးစခုန်တိန့်ယိန်းက“ဘယ်နားမှာလဲ ကျနော်လည်း မသိဘူး။ အဲ့ဒါ ကျနော်နဲ့လည်း မဆိုင်ဘူး။ ကျနော်လည်း မသိ ဘူး။ ကျနော့်ကိုလည်း လာမမေးကြဘူး။ လာလည်း မတိုင်ပင်ဘူး။ ပတ်လည်း မပတ်သက်ဘူး။ ဒီတော့ သူတို့ကို ဘာမှ လိုက်မပြောချင်ဘူး။ သဘောတူတယ်၊ မတူဘူး ပြောဖို့ မရှိပါဘူး”ဟုလည်း ပြောဆိုသည်။
ဒေသခံများက မေခမြစ်နှင့် ငေါ်ချန်းခ ရေအားလျှပ်စစ် စီမံကိန်းကိစ္စတို့နှင့် ပတ်သက်၍ အထူးဒေသ (၁) အာဏာ ပိုင်များ ဖြစ်သည့် နယ်ခြားစောင့်တပ် ခေါင်းဆောင် ဦးစခုန်တိန့်ယိန်း တို့ကို တစုံတရာ ပြောဆိုသွားမည် မဟုတ်ဘဲ နိုင်ငံတော် အစိုးရထံတွင်သာ တိုက်ရိုက် ဆက်လက် တောင်းဆိုသွားမည်ဟု ပြောဆိုကြသည်။
ဦးမုန်ရာက “ကျနော်တို့ကို မေတ္တာနဲ့ အုပ်ချုပ်တဲ့ သမ္မတကြီးဆီကို အိတ်ဖွင့်စာပေးရင် အစိုးရက ကျနော်တို့အတွက် ကြည့်ပေးမယ်။ ဆောင်ရွက်ပေးမယ်လို့ မျှော်လင့်ပါတယ်။ ဒါ့ကြောင့် ပေးပို့တာပါ။ ဦးစခုန်တိန့်ယိန်းတို့ ဘက်ကိုတော့ ကျနော်တို့ ဘာမှ ပြောစရာမရှိပါဘူး”ဟု ပြောသည်။
ချီဖွေ၊ ဆော့လော်မြို့နယ်နေ ပြည်သူလူထုများ အပါအဝင် ဒေသခံများကို ကိုယ်စားပြုသည့် ဘာသာရေးအဖွဲ့အစည်း များ၊ အမျိုးသမီးရေးရာ ကော်မတီ ၊ ဒေသအလိုက် စာပေ နှင့် ယဉ်ကျေးမှု ကော်မတီများမှ ကိုယ်စားလှယ်များ၊ ကချင် ရပ်ရွာ ဒေသဖွံ့ဖြိုးရေး ကိုယ်စားလှယ်များ စုစုပေါင်း ၄၅ ဦးက လက်မှတ်ထိုး၍ ကန့်ကွက်ကြောင်းကို အိတ်ဖွင့်ပေးစာ နှင့် အတူ ပူးတွဲတင်ပြ ထားသည်ဟုလည်း ကချင်ရပ်ရွာဒေသဖွံ့ဖြိုးရေးကိုယ်စားလှယ် တဦးဖြစ်သူ ဦးမုန်ရာက ဧရာဝတီကို ပြောသည်။
နယ်ခြားစောင့်တပ် ခေါင်းဆောင်လည်း ဖြစ်ပြီး ပြည်သူ့စစ်အဖွဲ့တွင်လည်း နာယက ဖြစ်သူ ဦးစခုန်တိန့်ယိန်းမှာ ချီဖွေ မြို့နယ်၏ အမျိုးသား လွှတ်တော်အမတ်အဖြစ် အနိုင်ရရှိခဲ့သော်လည်း ရွေးကောက်ပွဲအတွင်း မဲလာဆွယ်သည့် NLD ကိုယ်စားလှယ်များကို ရိုက်နှက်ခဲ့သည့် ဖြစ်စဉ်နှင့်ပတ်သက်၍ တရားစွဲဆိုခံရပြီး အမတ်အဖြစ်မှ ရုပ်သိမ်းခံထားရ သည်။
၂၀၁၅ ခုနှစ် နှစ်ကုန်ပိုင်းကလည်း ၎င်းဒေသအတွင်းရှိ ဘိန်းခင်းများကို ကချင် မူးယစ်ဆေးဝါး တိုက်ဖျက်ရေးအဖွဲ့ (Pat Jasan) အဖွဲ့က ဝင်ရောက်ဖျက်ဆီးရာ နယ်ခြားစောင့်တပ်နှင့် ပြည်သူ့စစ်တပ်ဖွဲ့ဝင်များက ၎င်းတို့ စားဝတ်နေရေး ဝင်ငွေအတွက် စိုက်ထားသည့် အခင်းများကို ဖျက်ဆီးသည်ဟု ဆိုကာ သေနတ်ဖြင့် ပစ်ခတ်၍ ဘိန်းခင်းများကို ကာကွယ်မှု ပြုလုပ်ခဲ့သေးသည်။
ဧရာဝတီ
ချီဖွေ မြို့နယ်အတွင်း တွေ့ရသော ငေါ်ချန်းခ ချောင်း(ဓာတ်ပုံ – နန်းလွင်နှင်းပွင့်/ဧရာဝတီ)

No comments: