Wednesday, September 28, 2016

ခြစားမှုဖယ်ရှားနိုင်လျှင် ၀င်ငွေလေးဆတိုးတက်မည်

ခြစားမှုဖယ်ရှားနိုင်လျှင် ၀င်ငွေလေးဆတိုးတက်မည်
Wednesday, September 28, 2016
------ ------ ------ ------ ------
( ၁ )
နိုင်ငံတနိုင်ငံတွင် ခြစားအကျင့်ပျက်မှုများ ဖြစ်ပွားနေပါသည်ဟု လူသိများလာပြီဆိုလျှင် ထိုနိုင်ငံသည် ပိုပြီးသန့်ရှင်းသော နိုင်ငံဖြစ်လာ နေသည်ဟု မှတ်ယူနိုင်ပါသည်ဟု ဇွန်လ ၄ ရက်နေ့ထုတ် Economist ဂျာနယ်က ရေးသားလိုက်ပါသည်။
ထိုဂျာနယ်က ရူမေးနီးယားနိုင်ငံ Hexi Pharma ဆေးကုမ္ပဏီပိုင်ရှင်က ကားကိုသစ်ပင်နှင့်ဝင်တိုက်ကာ မိမိဘာသာအဆုံးစီရင်သွားခဲ့ ပုံသတင်းကိုရည်ညွှန်း၍ ထိုသို့ရေးသားလိုက်ခြင်းဖြစ်ပါ၏။
ဆေးကုမ္ပဏီက ရူမေးနီးယားဆေးရုံများသို့ ပိုးသတ်ဆေး (Anti-Spetic) များ ရောင်းချခဲ့ရာတွင် ရေရောခဲ့သော ကြောင့် စွမ်းအင်ဆယ်ဆမျှ လျော့ကျကာ လူနာများစွာမသေသင့်ဘဲ သေခဲ့ကြရသည်ဟု စွပ်စွဲခဲ့ကြပါသည်။ နိုက်ကလပ်တခု မီးလောင်ရာတွင် လူ ၂၇ ဦးမျှသေခဲ့ကြရာမှ ဒဏ်ရာရသူများကို ဆေးရုံတင်ခဲ့သောအခါ ဆေးရုံတွင် ၃၇ ဦး ထပ်မံသေခဲ့ရသည်။ ပိုးသတ်ဆေးမှာ ပိုးမသတ်နိုင်သောကြောင့် ရူမေးနီးယားဆေးရုံများမှာ လူသတ်ရုံများ ဖြစ်ခဲ့ရသည်ဟု ရဲကဆိုသည်။
ရူမေးနီးယားနိုင်ငံမှာ ဥရောပကောင်စီ EU(European Union) သို့ ၂၀၀၇ ခုနှစ်က အသင်းဝင်ဖြစ်ခဲ့ရာ ဤဆေးကုမ္ပဏီအကြောင်း ဂျာနယ်တစောင်က ဖွင့်ချခဲ့ရာမှ အီးယူကောင်စီက ဖိအားပေးသဖြင့် စုံစမ်းမှုများ စတင်ပြုလုပ်ခဲ့သည်။ လာဘ်ပေးခြင်းဖြင့် ကုမ္ပဏီအငယ် ကလေးတခုက တပြည်လုံးဆေးရုံများအတွက် ဆေးတင်သွင်းရန် ကန်ထရိုက်ရခဲ့သည်။ အစိုးရအရာရှိများစွာ ပါဝင်ပတ်သက်ခဲ့ပြီး ကျန်းမာရေးဝန်ကြီး နုတ်ထွက်သွားရသည်။
ခြစားမှုတခုဖြစ်ပြီး တစုံတဦးကို အရေးယူမှုပြုလုပ်ပြီဆိုလျှင် ကမ္ဘာကြီးက သတိပြုမိလာကြသည်။ ထိုအခါအခြေအနေသည် ဆိုးရွားနေပြီဟု ကောက်ချက်ချတတ်ကြသည်။ သို့ပါသော်လည်း တကယ်စင်စစ်မှာ လူဆိုးသူခိုးတွေ ကျဆုံးပြီး တရားဥပဒေစိုးမိုးမှုပိုရှိလာခြင်းမှာ တိုင်းပြည်တိုင်းအတွက် ကောင်းပါသည်ဟု အီကော်နောမစ်သတင်းစာက ရေးသားလိုက်ခြင်း ဖြစ်ပါသည်။
( ၂ )
လူ့ယဉ်ကျေးမှု စဦးကာလကတည်းက လူတို့၏အကျင့်ပျက်ခြစားမှုများရှိခဲ့ဟန်တူသည်။ လူဦးရေတိုးပွားလာသလို စီးပွားရေးလုပ်ငန်းများ ကြီးမားကျယ်ပြန့်လာသလိုပင် လူတို့၏ ချမ်းသာဆင်းရဲကွာဟမှုမှာ လည်း ပိုမိုကြီးမားလာပြီး အကျင့်ပျက်မှုများမှာလည်း နေရာအနှံ့ရှိနေခဲ့ကြပါသည်။ အကျင့်ပျက်ခြစားခြင်း၊ အလွဲသုံးစားလုပ်ခြင်း၊ လိမ်လည်လှည့်ဖြားခြင်းတို့မှာ ကြိုက်သည်ဖြစ်စေ၊ မကြိုက်သည်ဖြစ်စေ ဆက်လက်ရှိနေဦးမည်သာဖြစ်သည်ဟု ပညာရှင်များကဆိုကြသည်။
အိန္ဒိယအစိုးရဟောင်းက ဟယ်လီကော်ပတာ ၁၂ စီးဝယ်ရာတွင် ပေါင်စတာလင် ၅၅၆ သန်းမျှ ကုန်ကျခဲ့ရာ ၅ ရာခိုင်နှုန်း သို့မဟုတ် ၁၀ ရာခိုင်နှုန်းမှာ အိန္ဒိယအစိုးရအရာရှိများကို လာဘ်ထိုးခဲ့ရသည်ဟု စွပ်စွဲထားကြသည်။ ဆင်းရဲသားပပျောက်ရေးလုပ်ငန်းများတွင်လည်း ဤအလွဲသုံးစားလုပ်ကြသော ပြဿနာမှာ ကြီးမားလှသည်။ အာရှတိုက်တွင် လူသန်း ၃၂၀ ကျော်မှာ ဆင်းရဲမွဲတေသူများဖြစ်သည်ဟု အာရှဘဏ်က ခန့်မှန်းထားပါသည်။ ၎င်းတို့၏ ၃၀ ရာခိုင်နှုန်းမှာ တောင်အာရှနိုင်ငံများမှ ဖြစ်ကြသည်။
ကမ္ဘာ့ဘဏ်အဆိုအရ ကမ္ဘာ့ဖွံ့ဖြိုးဆဲနိုင်ငံများမှ ခြစားမှုများကိုသာ ဖယ်ရှားနိုင်ပါက လူတို့၏ တဦးချင်းဝင်ငွေသည် လေးဆအထိ တိုးတက် များပြားလာဖွယ်ရှိ၏။ ပျမ်းမျှစီးပွားရေးလုပ်ငန်းများမှာ တနှစ်လျှင် ၃ ရာခိုင်နှုန်းအထိ တိုးတက်မှုရှိလာနိုင်သည်။ ကလေးသူငယ်သေနှုန်းမှာ ၇၅ ရာခိုင်နှုန်းအထိ လျော့ကျသွားနိုင်ပါသည်။
များပြားလှစွာသော သုတေသနပြုချက်များအရ ဤမသမာမှုများကြောင့် ဆင်းရဲသားများသာ အများဆုံးထိခိုက်ခံကြရသည်။ ဆင်းရဲ ချမ်းသာကွာခြားမှုကိုလည်း ပိုမိုကြီးမားလာစေသည်။ တာဝန်ရှိသူများကို လာဘ်ပေးရသော ဤအကျင့်မှာ လူများစွာ၏ ဘ၀အစိတ်အပိုင်း တခုလိုဖြစ်လာခဲ့ကြပါသည်။ တံစိုးလက်ဆောင် ပေးရခြင်း၊ လာဘ်ပေးရခြင်း တခုခုသောအကျိုးကိုမျှော်၍ အခမဲ့အကျိုးဆောင်ပေးရခြင်းတို့မှာ ဒေသဆိုင်ရာ ယဉ်ကျေးမှုထုံးစံတခုလိုပင် ဖြစ်လာခဲ့သည်။ ဤသည်မှာပင် ကျေးဇူးတင်ခြင်း၏ လက္ခဏာ၊ မိတ်ဆွေဖြစ်သူကို ထိန်းသိမ်းထားလိုခြင်း လက္ခဏာများဖြစ်လာကြသည်။ အချို့လာဘ်ပေးလာဘ်ယူမှုကို အားမပေးလိုသောဝန်ထမ်းများသည်ပင် ပတ်ဝန်းကျင်တွင် ထီးထီးရပ်တည်ရန် ခဲယဉ်းသဖြင့် မိုးခါးရေလိုက်ပြီး သောက်ကြရသည်။ သို့ပါသော်လည်း ဤခြစားခြင်း ဓလေ့ဆိုးကို ခိုင်ခံ့သောလူမှုအဖွဲ့ဥပဒေနှင့်စည်းကမ်းကို ထိန်းသိမ်းထားလိုသော အစိုးရ များအတွက် နိုင်ငံများစွာတို့တွင် အောင်မြင်မှု ရရှိနိုင်ကြောင်းမှာ သိသာထင်ရှားလာနေပါသည်။ နိုင်ငံခြားရင်းနှီးမြှုပ်နှံမှုများ ပိုမိုရောက်ရှိလာစေရန်နှင့် နိုင်ငံ၏ စီးပွားရေးဖွံ့ဖြိုးတိုးတက်လာစေရန် ခြစားမှုကင်းသော ပတ်ဝန်းကျင်ကို ဖန်တီးပေးထားရန် လိုအပ်ပေသည်။
( ၃ )
ယမန်နှစ်က ရာထူးမှပြုတ်သွားသော ဂွါတီမာလာနိုင်ငံ သမ္မတဟောင်း Otto Perez Molina မှာ လာဘ်စားမှုနှင့်ဖမ်းဆီးခံရပြီး တရားရင်ဆိုင်နေရသည်။ မသမာမှုများကို တားဆီးရန် ဂွါတီမာလာနိုင်ငံတွင် ကုလသမဂ္ဂမှ ဖွဲ့စည်းပေးထားသော ICIG ခေါ် (International Commission against Impuinity Guatemala) အဖွဲ့ရှိသည်။ သမ္မတနှင့် ဒုသမ္မတတို့မှာ အကောက်ခွန်အေဂျင်စီမှ လာဘ်ပေးလာဘ်ယူကိစ္စ များကို စုံစမ်းရာမှာ ဖမ်းဆီးစစ်ဆေးခံကြရသည်။
သမ္မတဟောင်း၏ ဓာတ်ပုံနှင့်အတူ အဖမ်းခံရသည့်သတင်းကို နိုင်ငံတကာ သတင်းစာကြီးများ၏ မျက်နှာဖုံးများတွင် တွေ့ကြရသည်။ ဂွါတီမာလာနိုင်ငံ၏ အကျင့်ပျက်ခြစားမှု တိုက်ဖျက်ရေးလုပ်ငန်းများမှာ အောင်မြင်သည်ဟုသာ ဆိုရန်ရှိတော့သည်။
ကိုသန်းလွင်
(Ref:Why the world must fight to end corruption, by Asit Biswas , Straits Times.)

No comments: