Friday, October 28, 2016

ပြည်ထောင်စုငြိမ်းချမ်းရေးဆွေးနွေးမှု ပူးတွဲကော်မတီ (UPDJC) အစည်းအဝေးကျင်းပ ပြည်ထောင်စုငြိမ်းချမ်းရေး ဆွေးနွေးမှု ပူးတွဲကော်မတီဥက္ကဋ္ဌ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် တက်ရောက်

ပြည်ထောင်စုငြိမ်းချမ်းရေးဆွေးနွေးမှု ပူးတွဲကော်မတီ (UPDJC) အစည်းအဝေးကျင်းပ
ပြည်ထောင်စုငြိမ်းချမ်းရေး ဆွေးနွေးမှု ပူးတွဲကော်မတီဥက္ကဋ္ဌ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် တက်ရောက်
 
နေပြည်တော် အောက်တိုဘာ ၂၈
 
ပြည်ထောင်စုငြိမ်းချမ်းရေးဆွေးနွေးမှု ပူးတွဲကော်မတီ (UPDJC) အစည်းအဝေး ပထမနေ့ကို ယနေ့မွန်းလွဲ ၂နာရီတွင် နေပြည်တော် ဟိုတယ်ဇုန်ရှိ သင်္ဂဟဟိုတယ်၌ ကျင်းပရာ ပြည်ထောင်စုငြိမ်းချမ်းရေးဆွေးနွေးမှု ပူးတွဲကော်မတီ (UPDJC)ဥက္ကဋ္ဌ နိုင်ငံ တော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် တက်ရောက်မိန့်ခွန်း ပြောကြားသည်။
အစည်းအဝေးသို့ ပြည်ထောင်စုငြိမ်းချမ်းရေးဆွေးနွေးမှု ပူးတွဲကော်မတီ အဖွဲ့ဝင်များ ဖြစ်ကြသည့် အစိုးရအဖွဲ့မှ ကိုယ်စားလှယ်များ၊ နိုင်ငံရေးပါတီများမှ ကိုယ်စား လှယ်များ၊ တစ်နိုင်ငံလုံးပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) လက်မှတ်ရေးထိုးထား သည့် တိုင်းရင်းသားလက်နက်ကိုင်အဖွဲ့အစည်းများမှ ကိုယ်စားလှယ်များနှင့် တာဝန်ရှိသူ များ တက်ရောက်ကြသည်။
အစည်းအဝေးတွင် နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က အဖွင့်မိန့်ခွန်းပြောကြားရာ၌ UPDJC၏ အဓိကပန်းတိုင်မှာ ငြိမ်းချမ်းရေးပင်ဖြစ်ပါ ကြောင်း၊ စစ်မီးများငြိမ်းမှ မိမိတို့အေးချမ်းမည်ဖြစ်ပါကြောင်း၊ အေးချမ်းမှုရှိမှ ချမ်းသာ အောင် လုပ်နိုင်မည်ဆိုသည့် စကားလည်းရှိပါကြောင်း၊ ထို့ကြောင့် UPDJC ၏ အဓိက တာဝန်မှာ ပဋိပက္ခများ ငြိမ်းချမ်းပြီး ချမ်းသာသည့် ပြည်ထောင်စုကြီး တည်ထောင်နိုင်ရန် ပင် ဖြစ်ပါကြောင်း၊ ပဋိပက္ခများ ချုပ်ငြိမ်းရေးသည် လက်နက်ကိုင်တပ်ဖွဲ့များ အားလုံးနှင့် သက်ဆိုင်ပါကြောင်း။
ငြိမ်းချမ်းရေးတည်ဆောက်မည်ဆိုပါက တစ်ယောက်နှင့် တစ်ယောက် သဘော ထားခြင်း ဖလှယ်ရမည်၊ အပြန်အလှန် စကားပြောရမည်ဖြစ်ပါကြောင်း၊ ထိုသို့ ဆွေးနွေး တိုင်ပင်ပြီးမှ အဖြေတစ်ခုရမည်ဖြစ်ပါကြောင်း၊ ထိုအချိန်မှ သဘောတူညီချက်များကို အကောင်အထည်ဖော်ရမည်ဖြစ်ပါကြောင်း၊ ထိုသို့ တစ်ဆင့်ပြီးတစ်ဆင့် လုပ်ဆောင် သွားရန်သည် အင်မတန် အရေးကြီးပါကြောင်း၊ မိမိတို့နိုင်ငံတွင် တိုင်းရင်းသားလူမျိုး ပေါင်းများစွာ ရှိသည့်အတွက် အမျိုးသားအဆင့် ဆွေးနွေးပွဲများတွင် အားလုံးပါဝင်နိုင်ရန် ဦးတည်ပါကြောင်း၊ အားလုံးပါဝင်နိုင်ခြင်းဆိုသည်မှာ အားလုံးကို ကိုယ်စားပြုသည့် ပုဂ္ဂိုလ်များပါဝင်နိုင်ရေးကို ဆိုလိုခြင်းဖြစ်ပါကြောင်း။
အမျိုးသားအဆင့် ဆွေးနွေးပွဲများနှင့် ပတ်သက်၍ စမ်းသပ်ကာလရောက်ပြီဟု ထင်မြင်ယူဆမိပါကြောင်း၊ တစ်ချိန်တည်းတွင် တစ်တိုင်းပြည်လုံး၌ အားလုံးကို လုပ်ရန်သည် မဖြစ်နိုင်ပါကြောင်း၊ ထို့ကြောင့် ပထမဦးစွာ ဒေသကိုအခြေခံခြင်း၊ အမျိုးသားရေးကို အခြေခံခြင်း၊ လူမျိုးရေးရာကိုအခြေခံခြင်း စသည့် အမျိုးသားအဆင့် ဆွေးနွေးပွဲ ၃ မျိုးကို နိုဝင်ဘာလတွင် ဆောင်ရွက်ရန် ရည်ရွယ် ထားပါကြောင်း၊ အဆိုပါ ဆွေးနွေးပွဲများမှ ရလဒ်များကိုကြည့်၍ ပိုမိုပီပြင်အောင် မည်သို့ဆောင်ရွက်ရမည်ကို ဆုံးဖြတ်နိုင်မည်ဖြစ်ပါကြောင်း။
ထို့ပြင် မိမိတို့အဖွဲ့များအကြား ရင်းနှီးမှုရှိစေရန်၊ နီးစပ်မှုရှိစေရန် တစ်ဦးနှင့် တစ်ဦးနားလည်မှုယူနိုင်စေရန် အားလုံးက ၀ိုင်း၍ ကူညီပေးကြရန် မေတ္တာရပ်ခံ လိုပါကြောင်း၊ ငြိမ်းချမ်းရေးဖြစ်စဉ်တွင် အားလုံးတစ်စုတစ်စည်းတည်း ပါဝင်လာအောင် ဆောင်ရွက်ရန် မိမိတို့ တစ်ဦးချင်း တစ်ဦးချင်းတွင် တာဝန်ရှိပါကြောင်း၊ ငြိမ်းချမ်းရေး ကို အမှန်တကယ်လိုချင်ပါက ယခုအစည်းအဝေးတွင် ထိုင်နေကြသည့် ပုဂ္ဂိုလ်များသာမက ယခုအစည်းအဝေးသို့ မတက်ရောက်သော်လည်း ငြိမ်းချမ်းရေးအတွက် ကြိုးပမ်းနေ သည့် အစုအဖွဲ့များ၊ ပုဂ္ဂိုလ်များနှင့် ဆက်နွယ်သည့်သူများအားလုံးသည် တစ်ဦးချင်း တစ်ဦး ချင်းစီ၌ တာဝန်ရှိသည်ဟု ခံယူစေလိုပါကြောင်း။
ထို့ကြောင့် အပစ်အခတ်ရပ်စဲရေးစာချုပ်တွင် လက်မှတ်မထိုးရသေးသည့် အစုအဖွဲ့များ တာဝန်ယူလာနိုင်စေရန် မည်သို့ဆောင်ရွက်ရမည်ဆိုသည့် နည်းလမ်းများ ကိုလည်း မိမိတို့ရှာဖွေရမည်ဖြစ်ပါကြောင်း။
ငြိမ်းချမ်းရေးရရန် ပဋိပက္ခများချုပ်ငြိမ်းရေး နည်းလမ်းတစ်မျိုး တည်းသာရှိပါ ကြောင်း၊ ထို့ကြောင့် ပဋိပက္ခရပ်စဲရေးကို အားလုံးက ဦးတည်ရမည်ဖြစ် ပါကြောင်း၊ မိမိတို့တွင် အချိန်ဆွဲနိုင်သည့် အခြေအနေမရှိပါကြောင်း၊ မိမိတို့ နိုင်ငံသည် အချိန်ဆွဲ၍ မရပါကြောင်း၊ ငြိမ်းချမ်းရေးညီလာခံ ပြင်ပတွင်နေ၍ အချိန်မဆွဲကြရန်နှင့် အားလုံးပါဝင်ကြရန် လိုအပ်ပါကြောင်း၊ အချိန်ဆိုသည်မှာ အကန့်အသတ်ရှိပါကြောင်း၊ အချိန်နှင့် ဒီရေသည် လူကိုမစောင့် ဟူသည့် စကားပုံကို အားလုံးကြားဖူးကြလိမ့်မည် ဖြစ်ပါကြောင်း၊ မိမိတို့သည် အချိန်ကို မှန်မှန်ကန်ကန်သုံးစွဲရန် လိုအပ်ပါကြောင်း။
ဒုတိယပင်လုံအစည်းအဝေးကို ဖေဖော်ဝါရီလတွင် ကျင်းပရန် မျှော်မှန်းထား ပါကြောင်း၊ အားလုံးသည် အပစ်အခတ်ရပ်စဲရေးတွင် လက်မှတ်ရေးထိုးပြီး ငြိမ်းချမ်းရေး ညီလာခံ၌ အပြည့်အ၀ပါဝင်လာနိုင်မည်ဟု မျှော်လင့်ပါကြောင်း၊ အဆိုပါ မျှော်လင့်ချက် ကိုလည်း အကောင်အထည်ဖော်နိုင်ရန် မိမိတို့ကြိုးစားသွားမည်ဖြစ်ပါကြောင်း၊ ယခု အစည်းအဝေးသို့ တက်ရောက်လာကြသည့် ပုဂ္ဂိုလ်များအားလုံးကလည်း ၀ိုင်းဝန်းကြိုး ပမ်း ပေးကြပါရန် မိမိအနေဖြင့် မေတ္တာရပ်ခံပါကြောင်း။
မိမိတို့နိုင်ငံ၏ တိုးတက်မှုသည် ကမ္ဘာ့၏ တိုးတက်မှု၊ အောင်မြင်မှုဟု ရှုမြင်နေကြသည့် မိတ်ဆွေများ၊ ပညာရှင်များသည် NRPC ၏ ငြိမ်းချမ်းရေးလုပ်ငန်း များကို ပံ့ပိုးရန် အဆင်သင့်ရှိပါကြောင်း၊ မိမိတို့အားလုံး ၀ိုင်းဝန်းလက်တွဲ၍ ဖန်တီးကြရန် အဆင်သင့် ဖြစ်နေပြီဖြစ်ပါကြောင်း၊ ထို့ကြောင့် အဆင်သင့်ဖြစ်နေသည့် အခြေ အနေမှ တဆင့်တိုးပြီး အားလုံးက တက်တက်ကြွှကြွ ပါဝင်နိုင်သည့် အဆင့်သို့ သွားရန်အတွက် မိမိတို့ ကြိုးပမ်းဆောင်ရွက်ကြရမည်ဖြစ်ပါကြောင်း၊ အားလုံးကလည်း ၀ိုင်းဝန်းကူညီကြ ပါရန် မိမိအနေဖြင့် မေတ္တာရပ်ခံပါကြောင်း ပြောကြားသည်။
ပြည်ထောင်စုငြိမ်းချမ်းရေးဆွေးနွေးမှုပူးတွဲကော်မတီအဖွဲ့ဝင် တိုင်းရင်း သား လက်နက်ကိုင်အဖွဲ့အစည်းများအစုအဖွဲ့မှ ဒုတိယဥက္ကဋ္ဌ ပဒို စောကွယ်ထူးဝင်းက မြန်မာနိုင်ငံ၏ လွတ်လပ်ရေးနှင့်အတူ ပေါ်ပေါက်လာသည့် လက်နက်ကိုင် ပဋိပက္ခများ သည် နိုင်ငံတော်အတွက် အကျိုးမရှိသည့်အပြင် နိုင်ငံတော်အစိုးရနှင့် တိုင်းရင်းသားပြည် သူများအတွက် ဆုံးရှုံးမှုများစွာကို ဖြစ်ပေါ်စေခဲ့ပါကြောင်း၊ ထို လက်နက်ကိုင်ပဋိပက္ခများ ချုပ်ငြိမ်းပြီး ငြိမ်းချမ်းရေးကိုအမှန်တကယ် အကောင်အထည်ဖော် ဆောင်ရွက်နိုင်ရန် အတွက် ပြည်သူအားလုံးက တတ်နိုင်သည့်ဘက်မှ မိမိတို့ တတ်နိုင်သည့်တာဝန်ကို ပူးပေါင်းပါဝင် ဆောင်ရွက်ကြရန် လိုအပ်ပါကြောင်း၊ ထို့ပြင် ငြိမ်းချမ်းရေးကိုအကောင် အထည်ဖော်ဆောင်ရွက်နေသည့် ခေါင်းဆောင်များသည် အချိန်မဆွဲဘဲ အမြော်အမြင် ရှိရှိ၊ ဇွဲသတ္တိရှိရှိ ဆောင်ရွက်ရန် လိုအပ်သည့်အပြင် ပစ်ခတ်တိုက်ခိုက်မှုများ ရပ်စဲရန်လည်း အထူးလိုအပ်ပါကြောင်း ပြောကြားသည်။
ပြည်ထောင်စုငြိမ်းချမ်းရေးဆွေးနွေးမှု ပူးတွဲကော်မတီ အဖွဲ့ဝင် နိုင်ငံရေးပါတီများ အစုအဖွဲ့မှ ဒုတိယဥက္ကဋ္ဌ ဦးသုဝေ က အစိုးရအဆက်ဆက် ငြိမ်းချမ်းရေးကြိုးပမ်း ဆောင်ရွက်ခဲ့မှုများမှ သင်ခန်းစာယူရမည့် အားနည်းချက်၊ အားသာချက်များကို ဆွေးနွေး ပြောကြားသည်။
ယနေ့ကျင်းပသည့် ပြည်ထောင်စုငြိမ်းချမ်းရေးဆွေးနွေးမှု ပူးတွဲကော်မတီအစည်း အဝေး ပထမနေ့တွင် နိုင်ငံရေးဆွေးနွေးမှုဆိုင်ရာမူဘောင် ပြန်လည်သုံးသပ်မှု ဆောင် ရွက်ချက်များအား UPDJC အတွင်းရေးမှူးအဖွဲ့က ရှင်းလင်းတင်ပြခြင်း၊ နိုင်ငံရေးဆွေးနွေးမှု အဆင့်ဆင့်ပုံစံကို ဆွေးနွေးအတည်ပြုခြင်း၊ အမျိုးသားအဆင့် နိုင်ငံရေးဆွေးနွေးပွဲများ လုပ်ငန်းလမ်းညွှန်ကို ဆွေးနွေးအတည်ပြုခြင်း၊ အမျိုးသားအဆင့် နိုင်ငံရေးဆွေးနွေးပွဲများ ကြီးကြပ်မှုကော်မတီ (တိုင်းဒေသကြီးများ၊ ပြည်နယ်များ၊ နေပြည်တော်ကောင်စီနယ်မြေ) လုပ်ငန်းလမ်းညွှန်ကို ဆွေးနွေးအတည်ပြုခြင်း၊ UPDJC ရုံးအဖွဲ့ ဖွဲ့စည်းပုံဆိုင်ရာ မူဝါဒအား အတည်ပြုခြင်း၊ အမျိုးသားအဆင့်နိုင်ငံရေးဆွေးနွေး ပွဲများတွင် ဆွေးနွေးမည့်ခေါင်း စဉ်များ နှင့် နိုင်ငံရေးဆွေးနွေးပွဲဆိုင်ရာကိစ္စရပ်များကို ဆွေးနွေးအတည်ပြုခြင်းတို့ကို ဆောင်ရွက်ခဲ့ ကြောင်းသိရသည်။
ထို့နောက် နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ဆွေးနွေး ချက်များကို ပြန်လည်သုံးသပ်ဆွေးနွေးပြီး နိဂုံးချုပ်အမှာစကား ပြောကြားသည်။
 

 

No comments: