Wednesday, November 16, 2016

ကုန်ဈေးနှုန်းကို အစိုးရက တိုက်ရိုက်ထိန်းချုပ်ဖို့ မသင့်ကြောင်း စီးပွားကူးသန်းဝန်ကြီးပြော

ကုန်ဈေးနှုန်းကို အစိုးရက တိုက်ရိုက်ထိန်းချုပ်ဖို့ မသင့်ကြောင်း စီးပွားကူးသန်းဝန်ကြီးပြော

16 November 2016
( စီးပွားရေးနဲ့ ကူးသန်းရောင်းဝယ်ရေး ပြည်ထောင်စုဝန်ကြီး ဒေါက်တာသန်းမြင့် နိုဝင်ဘာလ ၁၆ ရက်နေ့က ပြည်သူ့လွှတ်တော်မှာ တင်ပြနေစဉ် ) Photo: Win Naung Toe/ RFA
ကုန်ဈေးနှုန်း တရိပ်ရိပ်တက်နေမှုကို အစိုးရက တိုက်ရိုက်ထိန်းချုပ်ဖို့ မသင့်ကြောင်း စီးပွားရေးနဲ့ ကူးသန်းရောင်းဝယ်ရေး ပြည်ထောင်စုဝန်ကြီး ဒေါက်တာသန်းမြင့်က ဒီနေ့ ပြည်သူ့လွှတ်တော်မှာ တင်ပြခဲ့ပါတယ်။

အရပ်ရပ်ကုန်ဈေးနှုန်း တရိပ်ရိပ်တက်နေမှုကို အစိုးရရဲ့ တာဝန်ယူမှု၊ တာဝန်ခံမှုအရ ထိန်းချုပ်ဖို့ အစီအစဉ်ရှိ၊ မရှိ မေးခွန်းကို ပြည်သူ့လွှတ်တော်ကိုယ်စားလှယ် ဒေါ်ခင်နှင်းသစ်က ဒီနေ့ မေးမြန်းခဲ့ရာ စီးပွားရေးနဲ့ ကူးသန်းရောင်းဝယ်ရေးဝန်ကြီး ဒေါက်တာသန်းမြင့်က ပြန်လည်ဖြေကြားခဲ့တာ ဖြစ်ပါတယ်။

ပြည်ထောင်စုဝန်ကြီး ဒေါက်တာသန်းမြင့်က ငွေကြေးဖောင်းပွမှု အခြေအနေတွေ၊ ကုန်ဈေးနှုန်း တက်ရတဲ့ အကြောင်းအရင်းတွေနဲ့ ကုန်ဈေးနှုန်းမြင့်မားလာတဲ့ နှုန်းထားတွေကို အကျယ်တဝင့် ရှင်းပြနေတာကြောင့် လွှတ်တော်ဥက္ကဌ ဦးဝင်းမြင့်က နိဂုံးချုပ်ဖို့ ဝန်ကြီးကို သတိပေးခဲ့ပြီး မေးခွန်းကို ထိထိရောက်ရောက် ဖြေဖို့လည်း တိုက်တွန်းခဲ့ပါတယ်။

မေးခွန်းမေးမြန်းတဲ့ လွှတ်တော်ကိုယ်စားလှယ် ဒေါ်ခင်နှင်းသစ်က ဝန်ကြီးရဲ့ ဖြေကြားမှုဟာ ပြည့်စုံမှုမရှိဘူးဆိုပြီး ထပ်ဆင့်မေးခွန်းဆက်လက်မေးမြန်းခဲ့ပေမယ့် ထပ်ဆင့်မေးခွန်းကို ဖြေကြားဖို့ အဆင်သင့်မဖြစ်သေးဘူးဆိုပြီး ဝန်ကြီး ဒေါက်တာသန်းမြင့် က ဖြေဆိုဖို့ ငြင်းဆန်ခဲ့တဲ့အတွက် လာမယ့် နောက်တစ်ကြိမ်လွှတ်တော်အစည်းအဝေးမှာ ပြန်လည်ဖြေဆိုပေးဖို့ လွှတ်တော်ဥက္ကဌ ဦးဝင်းမြင့်က ၀န်ကြီးကို ပြောကြားခဲ့ပါတယ်။

RFA Burmese
https://www.facebook.com/rfaburmese

No comments: