Thursday, November 24, 2016

ဗိုလ်ချုပ်ရုပ်ပုံပါ ငွေစက္ကူများ အစားထိုးရိုက်နှိပ်ထုတ်ဝေရန် အစိုးရ အဖွဲ့၏ သဘောတူညီချက်၊ ပြည်ထောင်စုလွှတ်တော်၏ အတည်ပြုချက်ရယူရမ ည်ဖြစ်ကြောင်း ဗဟိုဘဏ်ဒုဥက္ကဋ္ဌဆို

ဗိုလ်ချုပ်ရုပ်ပုံပါ ငွေစက္ကူများ အစားထိုးရိုက်နှိပ်ထုတ်ဝေရန် အစိုးရ အဖွဲ့၏ သဘောတူညီချက်၊ ပြည်ထောင်စုလွှတ်တော်၏ အတည်ပြုချက်ရယူရမ ည်ဖြစ်ကြောင်း ဗဟိုဘဏ်ဒုဥက္ကဋ္ဌဆို
Thursday, November 24, 2016
 
 
မြန်မာနိုင်ငံ၌ လက်ရှိလှည့်လည်သုံးစွဲနေသော ငွေစက္ကူအမျိုးမျိုးပေါ်တွင် နိုင်ငံ့ အာဇာနည်ခေါင်းဆောင်ကြီး ဗိုလ်ချုပ်အောင်ဆန်း၏ရုပ်ပုံပါငွေစက္ကူများ အစား ထိုးရိုက်နှိပ်ထုတ်ဝေရန်မှာ မြန်မာနိုင်ငံတော်ဗဟိုဘဏ် ဥပဒေပုဒ်မ ၆၆ အရ အစိုးရအဖွဲ့ ၏သဘော တူညီချက်ဖြင့် ဆောင်ရွက်နိုင် မည်ဖြစ်ပြီး ပြည်ထောင်စု လွှတ်တော်၏ အတည်ပြုချက် ရယူရမည်ဖြစ်ကြောင်း နိုဝင်ဘာ ၂၂ ရက်က ကျင်းပသည့် ပြည်သူ့ လွှတ်တော် အစည်းအဝေးမှ သိရသည်။
မြန်မာပြည် တစ်ဝန်း ကိုင်တွယ်သုံးစွဲနေသော ငွေစက္ကူအမျိုးမျိုးပေါ်ရှိ ဆင်တံဆိပ် နှင့် ခြင်္သေ့တံဆိပ်ရုပ်ပုံများအစား အမျိုးသားခေါင်းဆောင်ကြီး ဗိုလ်ချုပ်အောင်ဆန်း ရုပ်ပုံပါသောငွေစက္ကူများဖြင့် အစားထိုးရိုက်နှိပ်သုံးစွဲရန် အစီအစဉ် ရှိ မရှိနှင့်ပတ်သက်ပြီး လွှတ်တော်ကိုယ်စားလှယ် ဦးကံမြင့်၏မေးမြန်းချက် အပေါ် မြန်မာနိုင်ငံတော်ဗဟိုဘဏ် ဒုတိယဥက္ကဋ္ဌ ဦးစိုးမင်းက ထိုသို့ ပြန်လည်ဖြေကြားခဲ့ခြင်းဖြစ်သည်။
အဆိုပါငွေစက္ကူသစ်များ ရိုက်နှိပ်ထုတ်ဝေမည်ဆိုလျှင် လှည့်လည်သုံးစွဲလျက်ရှိ သည့်ငွေပမာဏကို လဲလှယ်ပေးနိုင်ရန် လှည့်လည်သုံးစွဲလျက်ရှိသည့် ပမာဏနီးပါးကို မှာကြားရိုက်နှိပ်သိုလှောင်ထားရမည်ဖြစ်သည့်အတွက် ကုန်ကျစရိတ်လည်း ပိုမိုရှိလာ နိုင်သလို ငွေစက္ကူပုံစံ အမျိုးမျိုးရှိနေသည့် အတွက် ငွေစက္ကူအပေါ် ပြည်သူများ ယုံကြည် မှုအားနည်းလာနိုင်သည့် အတွက် နိုင်ငံစီးပွားရေးတည်ငြိမ်သည့် သင့်လျော်သောကာလ တွင် ဥပဒေပြဋ္ဌန်းချက်များနှင့်အညီ ဆောင်ရွက်သွားမည်ဖြစ်ကြောင်း သိရသည်။
''လှည့်လည်သုံးစွဲနေတဲ့ ငွေစက္ကူ Denominationတစ်ခုကို အပြည့်အဝ လဲလှယ်ပေးနိုင်ဖို့အတွက် ရိုက်နှိပ်သိုလှောင်ရမယ်ဆိုရင် ဘီလီယံ ၁ဝဝ လောက် ကုန်ကျမယ်။ ဒါဟာDenomination တစ်ခုအတွက်ပဲ ပြောတာ။ အသုံးများတဲ့Denomination အတွက် ရိုက်နှိပ်မယ်ဆိုရင် ဘီလီယံ ၃ဝဝ လောက်ကုန်ကျဖွယ် ရှိပါတယ်။ ပုံစံသစ်ငွေစက္ကူတွေ ထုတ်ဝေမယ်ဆိုရင် လက်ရှိလှည့်လည်သုံးစွဲနေတဲ့ ငွေစက္ကူတွေကိုလည်း ဖျက်ဆီးဖို့ လိုအပ်မှာဖြစ်တယ်။ ဒါကြောင့် ကုန်ကျစရိတ် ပိုမိုလာဖို့ ရှိတာရယ်၊ ပုံစံအမျိုးမျိုးရှိနေတဲ့အတွက် ပြည်သူတွေက ငွေစက္ကူပေါ်မှာ ယုံကြည်မှု အားနည်းလာနိုင်တာရယ်၊ ငွေစက္ကူအပေါ် မရေမရာဇဝေဇဝါဖြစ်ပေါ်ခြင်းတွေ ရှိလာနိုင် တဲ့အတွက်ရယ်၊ နောက်ပြီး လက်ရှိလှည့်လည်သုံးစွဲငွေတွေမှာ လဲလှယ်ဖို့အတွက် အခက်အခဲရှိတဲ့အတွက်ရယ် စတာတွေကြောင့် မြန်မာနိုင်ငံတော် ဗဟိုဘဏ် အနေနဲ့ ငွေစက္ကူတွေ ကို နိုင်ငံစီးပွားရေး တည်ငြိမ်တဲ့အချိန်မှာ အနှောင့်အယှက်မဖြစ်စေနိုင်တဲ့ သင့်လျော်တဲ့ကာလမှာ ပုဒ်မ ၆၅ နဲ့ ၆၅ ပါ ပြဋ္ဌာန်းချက်များနဲ့ အညီ ဆောင်ရွက် သွား မှာဖြစ်ပါတယ်'' ဟု ဗဟိုဘဏ်ဒုတိယဥက္ကဋ္ဌက ဆက်လက်ပြောကြား သည်။
သရက်မဲဆန္ဒနယ်မှ လွှတ်တော်ကိုယ်စားလှယ် ဦးကံမြင့်က ၄င်းမေးမြန်း သည့် မေးခွန်းနှင့်ပတ်သက်ပြီး ''က္ဘာတစ်လွှားနိုင်ငံတွေ ငွေစက္ကူထုတ်ဝေသုံးစွဲရာမှာ ပြည်တွင်းပြည်ပ လက်ခံကြတဲ့ အတိုင်းအတာပေါ်မူတည်ပြီး လှည့်လည် သုံးစွဲကြတယ်။ ငွေစက္ကူတွေရဲ့မျက်နှာစာမှာ အများအားဖြင့် ဘုရင်တွေ၊ ဘုရင်မတွေ၊ နိုင်ငံ့ခေါင်းဆောင် တွေ၊ အာဇာနည်တွေ၊ ကောင်းသတင်း ထင်ရှားကျော်ကြားသူတွေရဲ့ ရုပ်ပုံလွှာတွေကို နိုင်ငံသမိုင်းစာမျက်နှာတွေမှာ တင့်တယ်ဝင့်ထည်စွာ၊ လေးစား ကြည်ညိုဂုဏ်ယူစွာနဲ့ နေရာပေးနေကြတာ ကို လေ့လာတွေ့ရှိတယ်။
''အမေရိကန်၊ တရုတ်၊ အိန္ဒိယ၊ ထိုင်း၊ တောင်ကိုရီးယား၊ မလေးရှား စတဲ့ နိုင်ငံတွေ ရဲ့ငွေစက္ကူတွေပေါ်မှာ နိုင်ငံ့ခေါင်းဆောင်တွေ၊ ကောင်း သတင်းကျော်ကြားသူတွေရဲ့ ရုပ်ပုံလွှာတွေ ရိုက်နှိပ်ထားတယ်။ အဲ့ဒီလိုရိုက်နှိပ်ထားတဲ့အတွက် အင်မတန်ကျက်သရေရှိ လှပါတယ်။ ဘာကြောင့် ဒီငွေစက္ကူတွေမှာ ဒီလိုရုပ်ပုံလွှာတွေ ရိုက်နှိပ်ထားပါသလဲလို့ မေးလာတဲ့သူရှိတဲ့အခါ ရင်ကော့၊ ခေါင်းမော့ပြီး ဂုဏ်ယူစွာနဲ့ ဖြေကြားလိုက်လို့ ဖြစ်ပေါ် လာတဲ့ပီတိဟာ ဘာနဲ့မှ မလဲနိုင်တဲ့ ပီတိလည်းဖြစ်ပါတယ်။
''ကျွန်တော်တို့ မြန်မာနိုင်ငံမှာလည်း တစ်ချိန်က အမျိုးသားခေါင်းဆောင်ကြီး၊ အာဇာနည်ခေါင်းဆောင်ကြီး ဗိုလ်ချုပ်အောင်ဆန်းရဲ့ ရုပ်ပုံပါတဲ့ငွေစက္ကူတွေ ထုတ်ဝေ သုံးစွဲခဲ့ပါတယ်။ အခု မျက်မှောက်ကာလမှာတော့ က္ဘာ့အလယ်မှာ နိုင်ငံအတွက် ဂုဏ်ယူဝင့်ကြွားနိုင်မှုမရှိဘဲ ဆင်ရုပ်၊ ခြင်္သေ့ရုပ်တွေနဲ့ သုံးစွဲနေရသည်ကို တွေးမိတိုင်း စိတ်မကောင်းဖြစ်မိပါတယ်'' ဟု ဖွင့်ဟဆိုသည်။
မြန်မာနိုင်ငံတော်ဗဟိုဘဏ်က ထုတ်ဝေသည့်ပြည်တွင်းသုံး ငွေစက္ကူပုံစံများ နှင့်ပတ်သက်ပြီး ပုဒ်မ ၆၅ မှာ ဗဟိုဘဏ်သည် ငွေစက္ကူများနှင့် ဒင်္ဂါးများ၏တန်ဖိုး၊ အဆင်အပြင်ဖွဲ့စည်းပါဝင်သည့် ဝတ္ထုပစ္စည်းနှင့် အခြားခွဲခြားနိုင်သည့်လက္ခဏာများကို အစိုးရအဖွဲ့၏သဘောတူညီချက်ဖြင့် သတ်မှတ်ရမည်ဟု ပြဋ္ဌာန်းထားသည်။
ထို့အပြင် ငွေစက္ကူအမျိုးအစား ပြောင်းလဲသုံးစွဲခြင်းနှင့်ပတ်သက်ပြီး ပုဒ်မ ၆၆ တွင် ဗဟိုဘဏ်သည် မည်သည့် ငွေစက္ကူအမျိုးအစားကိုမဆို ပြောင်းလဲသုံးစွဲရန် လိုအပ်ပါက အစိုးရအဖွဲ့၏သဘောတူညီချက်ဖြင့် ဆောင်ရွက်နိုင်သည်။ ယင်းဆောင်ရွက် ချက်အခြေအနေကို အနီးစပ်ဆုံး ကျင်းပသည့် ပြည်ထောင်စုလွှတ်တော် အစည်းအဝေး သို့ တင်ပြ၍ အတည်ပြုချက်ရယူရမည်ဟု ပြဋ္ဌာန်းထားသည်။
မြန်မာနိုင်ငံတော်ဗဟိုဘဏ်အနေဖြင့် ငွေစက္ကူများထုတ်ဝေခဲ့ရာတွင် မြန်မာနိုင်ငံ လွတ်လပ်ရေးရပြီးနောက် ၁၉၄၈ ခုနှစ်၊ ၁၉၅၂ ခုနှစ်တွင် ဒေါင်းပုံပါသည့် တစ်ကျပ်တန်၊ ငါးကျပ်တန်၊ ၁ဝ တန်၊ ၁ဝဝ တန်ငွေစက္ကူများ ရိုက်နှိပ်ထုတ်ဝေခဲ့ကြောင်း၊ ၁၉၅၈ ခုနှစ်တွင် ဗိုလ်ချုပ်အောင်ဆန်းပုံပါသည့် တစ်ကျပ်တန်၊ ငါးကျပ်တန်၊ ၁ဝ တန်၊ ၁ဝဝ တန် ငွေစက္ကူများနှင့် အကြွေစေ့များကို ရိုက်နှိပ်ထုတ်ဝေခဲ့ကြောင်း၊ ၁၉၆၅ ခုနှစ် တွင်လည်း တစ်ကျပ်တန်၊ ငါးကျပ်တန်၊ ၁ဝ တန်၊ ၁ဝဝ တန် ငွေစက္ကူများ ဗိုလ်ချုပ် အောင်ဆန်းပုံနှင့် ပုံစံသစ်ငွေစက္ကူများ ရိုက်နှိပ်ထုတ်ဝေခဲ့ကြောင်း၊ ၁၉၉၄ ခုနှစ်တွင် ၂ဝ တန်၊ ၅ဝ တန်၊ ၁ဝဝ တန် ငွေစက္ကူများကို ခြင်္သေ့ပုံနှင့် ရိုက်နှိပ်ထုတ်ဝေခဲ့ကြောင်း၊ ၁၉၉၈ ခုနှစ်တွင် ကေသရာဇာခြင်္သေ့ပုံနှင့် ၁ဝဝဝ တန်ငွေစက္ကူကို ထုတ်ဝေခဲ့ကြောင်း၊ ၂ဝ၁၄ ခုနှစ်တွင် ၂ဝဝ တန်၊ ၅ဝဝ တန်၊ ၁ဝဝဝ တန်များကို အရွယ်အစားသစ်နှင့် ထုတ်ဝေခဲ့ကြောင်း၊ ၂ဝဝ၉ ခုနှစ်တွင် ၅ဝဝဝ တန်ငွေစက္ကူများကို ထုတ်ဝေခဲ့ကြောင်း၊ ၂ဝ၁၂ ခုနှစ်တွင် ၁ဝဝဝဝ တန်ငွေစက္ကူကိုထုတ်ဝေခဲ့ပြီး ၅ဝဝဝ တန်နှင့် ၁ဝဝဝဝ တန်ငွေစက္ကူများကို လုံခြုံရေးအဆင့်အတန်းတိုးမြှင့်ပြီး ၂ဝ၁၄ ခုနှစ်နှင့် ၂ဝ၁၅ ခုနှစ် တို့တွင် ထပ်မံထုတ်ဝေခဲ့ကြောင်း လေ့လာသိရှိရသည်။
ငွေစက္ကူရိုက်နှိပ်ရာတွင် ငွေစက္ကူဒီဇိုင်းရေးဆွဲခြင်း၊ ဒီဇိုင်းအတည်ပြုခြင်း၊ မှာကြား ခြင်း၊ ရိုက်နှိပ်ခြင်း၊ ကြိုတင်သိုလှောင်ထားရှိခြင်း လုပ်ငန်းစဉ်များရှိသည့် အတွက် အချိန်ကာလတိကျစွာ သတ်မှတ်နိုင်ခြင်း မရှိသေးကြောင်း သိရသည်။
'' နိုင်ငံ့ခေါင်းဆောင်တွေ၊ ထင်ရှားကျော်ကြားသူတွေရဲ့ ရုပ်ပုံလွှာတွေပါတဲ့ ငွေစက္ကူတွေကို မြင်တွေ့ရတဲ့ တိုင်းပြည်ရဲ့အနာဂတ်လူငယ်တွေအနေနဲ့လည်း လေးစားခြင်း၊ ဂုဏ်ယူခြင်းတွေနဲ့အတူ အားကျခြင်း၊ အတုခိုးခြင်းတွေ ဖြစ်လာပါမယ်။ နိုင်ငံအတွက်ရော၊ ကိုယ့်လူမျိုးအတွက်ရော တကယ်အင်မတန် ဂုဏ်ယူစရာကောင်းတဲ့ အရာပါ။ ငွေစက္ကူကို တိရ္ဆာန်ပုံပဲသိနေတော့ သူတို့အတွက် အတုယူစရာ၊ လေးစားစရာ၊ ဂုဏ်ယူစရာတို့ ဘာမှ မရှိတော့ဘူး။
''လူငယ်တွေကို ဗိုလ်ချုပ်လို ကိုယ်ကျိုးမဖက်ဘဲနဲ့ တကယ် တိုင်းပြည် ဘယ်လို အနစ်နာခံမယ်။ ဘယ်လို စွန့်စားမယ်ဆိုတဲ့ တကယ်ထူးချွန်တဲ့ နိုင်ငံရေးခေါင်းဆောင်တွေ ဖြစ်စေချင်တယ်။
အဲ့ဒီရည်ရွယ်ချက်နဲ့လည်း အခုလို မေးမြန်းခဲ့တာဖြစ်ပါတယ်။ ဒါကတော့ စီးပွားရေးလုပ်တာတော့ မဟုတ်ဘူး။ ငွေကုန်ကြေးကျတာတော့ ရှိမှာပဲ။ တိုင်းပြည်ရဲ့ဂုဏ်၊ နိုင်ငံရဲ့ ပုံရိပ်၊ နိုင်ငံ့ရဲ့ ကျက်သရေ၊ ဒါက ဘာနဲ့မှ လဲလို့မရဘူး။ ငွေကြေး ကုန်တာက အခြားလုပ်ငန်းတွေမှာ ကုန်နေတာပါပဲ။ နိုင်ငံ့ဂုဏ်က ဘာနဲ့မှလဲလို့ မရဘူးလို့ ကျွန်တော်ပြောချင်တယ်။ ဖြေကြားတဲ့သူအနေနဲ့ နိုင်ငံရဲ့စီးပွားရေးကောင်း နေတဲ့အချိန်မှာလို့ ပြောတယ်။ တကယ့်တကယ်တော့ ကောင်းတဲ့အချိန်ကလည်း မလုပ်ခဲ့ဘူး။ မကောင်းတဲ့အချိန်ကလည်း မလုပ်ခဲ့ဘူးဆိုရင် လက်ရှိ ရှိနေတဲ့အချိန်မှာ ကျွန်တော်တို့က မေးခွန်းမေးနေရခြင်းဖြစ်တယ်။ ဒါကို ပြည်သူတွေကလည်း တကယ် လိုအပ်နေတယ်'' ဟု ဦးကံမြင့်က ဆက်လက်ပြောကြားသည်။
MOI Webportal Myanmar
သတင်း-တင်မောင်လွင် (မြန်မာ့အလင်း)၊ ဓာတ်ပုံ-မောင်မွှေး

No comments: