Tuesday, November 8, 2016

ပညာရေး ဘာကြောင့် အရေးကြီးသလဲ

ပညာရေး ဘာကြောင့် အရေးကြီးသလဲ
\\ ငြိမ်းချမ်းအေး \\
 
Tuesday, November 8, 2016
ကျနော်တို့ တိုင်းပြည်မှာ အုပ်စိုးခဲ့သမျှ အစိုးရ အဆက်ဆက် အရင်ခေတ် စနစ် အဆက်ဆက်မှာလည်း ပညာရေးကို အားပေးတယ် ဆိုကြပါတယ်။ နဝတ/ နအဖ တပ်မတော် အစိုးရ လက်ထက်မှာဆိုရင် “ပညာရေးဖြင့် ခေတ်မီဖွံ့ဖြိုး တိုးတက်သော နိုင်ငံတော်သစ်ကြီး တည်ဆောက်အံ့” တောင် ဆိုခဲ့ကြပါတယ်။ ဒါပေမဲ့ လက်တွေ့ အခြေအနေကတော့ အားလုံး သိတဲ့အတိုင်းပါပဲ။ သူသူကိုယ်ကိုယ် ဖြတ်သန်းခဲ့ရ၊ ဖြတ်သန်းနေရဆဲ ခေတ် ဆိုး စနစ်ဆိုး ဒဏ်ရာအနာကို မှတ်မှတ်သားသားလေး ဖြစ်အောင် နိုင်ငံ တကာ အဖွဲ့အစည်းတွေက အညွှန်းကိန်းတွေနဲ့ လေ့လာကြည့်ရအောင်ပါ။ အနာကြီး တပြပြနဲ့လို့ ဆိုချင်လည်း ဆိုနိုင်ပါတယ်။
ကုလသမဂ္ဂ နိုင်ငံတကာ ဖွံ့ဖြိုးရေး အစီအစဉ် (UNDP) က ထုတ်ပြန်တဲ့ ၂၀၁၅ လူသားဖွံ့ဖြိုးမှု အစီရင်ခံစာပါ ညွှန်းကိန်းအရဆိုရင် မြန်မာနိုင်ငံက ကုလ အသိအမှတ်ပြု ကမ္ဘာ့နိုင်ငံ ၁၈၈ နိုင်ငံထဲမှာ ၀.၅၃၆ တန်ဖိုးနဲ့ အဆင့် ၁၄၈ ချိတ်ပါတယ်။ လူသားဖွံ့ဖြိုးမှု ညွှန်းကိန်းတွေက အဓိက အချက်ကြီး သုံးချက်ကို အခြေခံ တွက်ချက်ပါတယ်။ အသက်ရှည်နှုန်းကို အခြေခံတဲ့ ကျန်းမာ သက်ရှည် နေထိုင်နိုင်ခွင့်၊ အရွယ်ရောက်တဲ့ လူဦးရေရဲ့ ကျောင်းနေတဲ့နှစ် ပျမ်းမျှ အရေအတွက်ကို အခြေခံတဲ့ ပညာဗဟုသုတ ရှာဖွေနိုင်ခွင့်နဲ့ စုစုပေါင်း ပြည်တွင်းဝင်ငွေကို အခြေခံတွက်ချက်တဲ့ ကောင်းမွန်တဲ့ လူနေမှု အဆင့်အတန်း ခံစားနိုင်ခွင့် သုံးချက်ကို အခြေခံပါတယ်။
မဆလခေတ် ၁၉၈၀ ခုနှစ်ကနေပြန် ခြုံကြည့်ရင်တော့ ဒီညွှန်းကိန်း ၀.၅၃၆ (အဆင့် ၁၄၈) က တိုးတက်လာခြင်းပါလို့ အဆိုပါ အစီရင်ခံစာက ဆိုပါတယ်။ ဒါပေမဲ့ ဒါဟာ ဒေသတွင်းက အခြားဆင်းရဲတဲ့ (မဖွံ့ဖြိုးသေးတဲ့) လာအို (ညွန်းကိန်း ၀.၅၇၅ ၊ အဆင့် ၁၄၁) ၊ ကမ္ဘောဒီးယားနိုင်ငံ (၀.၅၅၅ ၊ အဆင့် ၁၄၃) တွေနဲ့ ယှဉ်ရင်တောင် အောက်ရောက်နေသေးတာကို သတိချပ်စေချင်ပါတယ်။
ဘဝမျက်မြင်အသိနဲ့ ကြည့်ရင်လည်း နိုင်ငံမှာ လူသားအရင်းအမြစ် အရည်အသွေး၊ ဖွံ့ဖြိုးမှုနဲ့ လူသားဂုဏ်အင်နဲ့ လျော်ညီစွာ သိက္ခာရှိရှိ လူသားတစ်ယောက်လို ပီပီပြင်ပြင် နေနိုင်မှု၊ မွေးရာပါ ရပိုင်ခွင့်တွေ ပြည့်စုံမှု အင်မတန် နိမ့်ကျနေတာကိုလည်း အားလုံး သိရှိနိုင်ပါတယ်။
ဒီပြသ၁နာ ကို ဖြေရှင်းဖို့ရာ အခြေခံ အုတ်မြစ်ဖြစ်တဲ့ နိုင်ငံရေး ပြသ၁နာ၊ စနစ်ပြသ၁နာကို မျက်မှောက်ပြုရပါမယ်။ တပါတည်းနဲ့လည်း လူသားဖွံ့ဖြိုးမှုအတွက် အင်မတန် အရေးပါတဲ့၊ ဒေါက်တိုင်တစ်ခုလည်း ဖြစ်တဲ့ ပညာရေးကိုလည်း ဇောင်းပေးရပါမယ်။ အထက်မှာ ဆိုခဲ့တဲ့ လူသားဖွံ့ဖြိုးရေးညွှန်းကိန်းပါ အခြေခံ အချက် သုံးခုစလုံးဟာ ပညာရေး ပါမှသာ ပြည့်စုံမှာ ဖြစ်လို့ ဖြစ်ပါတယ်။ ကျန်းမာ၊ ချမ်းသာ၊ သက်ရှည် ဗဟုသုတ ပြည့်စုံတဲ့ လူတမ်းစေ့ ဘဝနေထိုင်နိုင်ရေးအတွက်က ပညာရေးမှအပ အခြား အားကိုးရာမရှိပါ။
၂၀၁၁ နောက်ပိုင်း အရပ်သား အစိုးရလို ပြောကြတဲ့ ခေတ်စနစ် လွန်ခဲ့တဲ့ ငါးနှစ် (၂၀၁၀/၂၀၁၁-၂၀၁၆ ဧပြီ မတိုင်မီ) တိုင်းပြည်ရဲ့ ပညာရေးနဲ့ ကျန်းမာရေးကဏ္ဍ အသုံးစရိတ်တွေဟာ (အရင် စစ်တပ်လုံးလုံး အုပ်ချုပ်စဉ် ခေတ်များနဲ့ယှဉ်ရင်) များပြားလာခဲ့ပြီး ထိုက်သင့်တဲ့ အကောင်း အကျိုးသက်ရောက်မှုတွေ ရှိခဲ့ပါတယ်။ ဒါပေမဲ့ ဒီ စရိတ်ဟာလည်း ကာကွယ်ရေး စစ်စရိတ်တွေနဲ့ယှဉ်ရင် နည်းနေပါသေးတယ်။ ဒါတောင် တရားဝင် စစ်အသုံးစရိတ်က ၂၀၁၁-၂၀၁၂ ဘဏ္ဍနှစ်မှာ စုစုပေါင်းရဲ့ ၁၉.၂ ရာခိုင်နှုန်း သုံးနေရာကနေ ၂၀၁၄-၂၀၁၅ ခုနှစ် အရောက်မှာ ၁၂ ရာခိုင်နှုန်းအထိ လျှော့ချလာတာပါ။
အခု အရပ်သား အများစုလို့ ဆိုကြတဲ့ ဒီမိုကရေစီ ပါတီအစိုးရခေတ် သမ္မတ ဦးထင်ကျော် လက်ထက်မှာတော့ အစိုးရ ဘဏ္ဍာရေး အသုံးစရိတ်တွေကို ပညာရေး၊ ကျန်းမာရေးနဲ့ လူမှုဖူလုံရေး ကဏ္ဍတွေမှာ ပိုသုံးဖို့ ပြီးခဲ့တဲ့ ဇွန်လတုန်းက သမ္မတ ကိုယ်တိုင်က ဦးဆောင် တောင်းဆိုခဲ့ပါတယ်။ အစိုးရသစ်ဟာ လက်ရှိအချိန်ထိ ပြီးခဲ့တဲ့ အစိုးရခေတ် လွှတ်တော်က ဆွဲခဲ့တဲ့ ဘဏ္ဍာရေးပြဋ္ဌာန်းချက် အတိုင်းပဲ သွားနေရသေးတဲ့ အခက်အခဲရှိနေ လို့ ပြည်ထောင်စု လွှတ်တော်မှာ ပြီးခဲ့တဲ့ ဇူလိုင်လက အသုံးစရိတ် ပြန်လည် သတ်မှတ်ရေး လုပ်ခဲ့ကြပါတယ်။ ဒါပေမဲ့ မိုဘိုင်းဖုန်း ငွေဖြည့်ရာက ရတဲ့ အခွန်တွေကို ပညာရေးအတွက် သီးသန့် သုံးမယ်ဆိုတဲ့ ထပ်ဆောင်း ဖြည့်စွက် ပြင်ဆင်မှုပဲ သတ်မှတ်နိုင်ခဲ့ပါတယ်။
လက်ရှိ ဘဏ္ဍာရေးအသုံးစရိတ် ခွဲဝေမှုအရ ပညာရေးကဏ္ဍအတွက် ကျပ် ၁,၅၀၁ ကုဋေ (စုစုပေါင်း သုံးစွဲမှု ရဲ့ ၇.၀၃ ရာခိုင်နှုန်း) ရှိပါတယ်။ မနှစ်က စရိတ် ကုဋေ ကျပ် ၁, ၄၅၉ (၆.၇၉ ရာခိုင်နှုန်း) ထက်တော့ တိုးတက်လာပါတယ်။ ၂၀၁၆ ခုနှစ် ကျောင်းဖွင့်ရာသီမှာ ဆင်းရဲချမ်းသာ အားလုံးတန်းတူ ပညာသင်ခွင့်ရဖို့အတွက် အမှန်တကယ် ငွေကြေး ကုန်ကျမှုမရှိတဲ့ အခမဲ့ အခြေခံပညာရေး စနစ်ကို (အရင်ခေတ်တွေနဲ့ ယှဉ်ရင်) ပိုမို ကောင်းမွန်မှန်ကန် စနစ်ကျစွာ လက်တွေ့ အကောင်အထည် ဖော်နိုင်ခဲ့ တာကို သတိပြု မိပါတယ်။ အခု အစိုးရသစ်လက်ထက် ရက်ပေါင်း ၂၀၀ ကျော်အတွင်းမှာ ဗဟိုချုပ်ကိုင်မှု လျှော့ချပြီး အမှီအခိုကင်း ရပ်တည်နိုင်တဲ့ တက္ကသိုလ်နဲ့ ကျောင်း ပညာရေးစနစ်ကို အာမခံတဲ့ ပညာရေးဥပဒေနဲ့ လုပ်ထုံးလုပ်နည်းတွေ အချောသတ် ပြင်ဆင် အကောင်အထည် မဖော်နိုင်သေးတဲ့ အားနည်းချက်တွေ ရှိနေပေမယ့် သက်မွေး ပညာရေး၊ ကျောင်းပြင်ပ ပညာရေး ဆွေးနွေးပွဲတွေ အပါအဝင် အထွေထွေ ပညာရေးမြှင့်တင်မှု အစီအစဉ်တွေ ဖော်ဆောင်လာတာလည်း အကောင်းအဖြစ် မြင်ရပါတယ်။ ဒါကြောင့် ရေရှည်ဖွံ့ဖြိုးတိုးတက်မှုကို ဦးတည်စေတဲ့ ပညာရေးကဏ္ဍကို အလေးမပေးလို့ မဖြစ်လောက်အောင် တိုင်းပြည်ရဲ့ ပကတိ အခြေအနေက အလွန်အမင်း နိမ့်ကျနေပြီဆိုတာကို လက်ရှိ အစိုးရအဖွဲ့ တာဝန်ရှိသူများ အခြေခံကျကျ နားလည်တယ်ဆိုတာ ယုံကြည်ပါတယ်။
ကုစားရမယ့် အနာတွေကို စာရင်းနဲ့ ပြန်ဖွဲ့ရရင် အာရှဖွံ့ဖြိုးရေးဘဏ်က ထုတ်ပြန်တဲ့ ၂၀၁၆ ခုနှစ်အတွက် မြန်မာပြည်ဆိုင်ရာ စာရင်းဇယားမှာ တိုင်းပြည်ရဲ့ လူ လေးယောက်မှာ တစ်ယောက် (၂၅.၆ ရာခိုင်နှုန်း) ဟာ ဆင်းရဲမွဲတေမှု မျဉ်းအောက် သတ်မှတ်နိုင်တဲ့ ဝင်ငွေနဲ့ ရပ်တည်နေရတယ် ဆိုပါတယ်။ ဒါဟာ ဒေသတွင်းမှာ ဆင်းရဲမှု အမြင့်မားဆုံးပါ။ တိုင်းပြည်ရဲ့ ၇၀ ရာခိုင်းနှုန်းကျော် လူဦးရေ နေထိုင်နေတဲ့ ကျေးလက်ဒေသတွေမှာဆိုရင် ဆင်းရဲမှုနှုန်းက နှစ်ဆ မြင့်တက်နိုင်ပါတယ်။ မြန်မာပြည်မှာ ကလေးတစ်ထောင်မှာ အယောက် လေးဆယ်ဟာ သူတို့ရဲ့ တစ်နှစ်ပြည့် မွေးနေ့ မတိုင်ခင် အသက်ဆုံးရှုံးရတယ် လို့လည်း စာရင်းက ထောက်ပြပါတယ်။
ဒီအနေအထားက ရုန်းထွက်နိုင်ဖို့ရာ တိုင်းပြည်မှာ ပညာရေးကို အင်ပြည့်အားပြည့် ရင်းနှီးမြှုပ်နှံမှသာ ဖြစ်ပါမယ်။ ဘာကြောင့်ပါလဲ။ ကုလသမဂ္ဂနဲ့ နိုင်ငံတကာက သုတေသန တွေ့ရှိတွေကို အခြေခံပြီး အကြောင်းပြချက် သုံးချက် ကို အကျဉ်းချုံး တင်ပြပါမယ်။
၁) ပညာရေးက အသက်တွေကို ကယ်တင်နိုင်
ဆူကြုံနိမ့်မြင့် ကျား + မ အားလုံး တန်းတူ ပါဝင်နိုင်တဲ့ ပညာရေး စနစ်သာ တိုင်းပြည်မှာ တည်ဆောက်နိုင်ခဲ့ရင် လူမှု အသိုက်အဝန်းမှာ အမျိုးသမီး ကြီး/ငယ်များရဲ့ စွမ်းဆောင်ရည်နဲ့ လုပ်ပိုင်ခွင့်တွေ မြင့်တက်လာပါမယ်။ အကျိုးဆက် အဖြစ် မိသားစု စီးပွားရေးနဲ့ ဝင်ငွေ တိုးတက်လာပါမယ်။ ပညာရေး မြင့်လာခြင်းနဲ့ အတူ မိခင်တွေရဲ့ ကျန်းမာရေးအသိ ဗဟုသုတနဲ့ စဉ်းစားဆင်ခြင်နိုင်စွမ်းလည်း တိုးလာပြီး ကျန်းမာ သန်စွမ်း ဘေးကင်း လုံခြုံ နေထိုင်အသက်ရှင်နိုင်တဲ့ မိသားစု လူမှုဘဝတွေကို ပိုမို ဖန်တီးလာနိုင်ပါမယ်။ တပါတည်း မီးဖွားစဉ် မိခင်နဲ့ ကလေး သေဆုံးမှု၊ အသက် ငါးနှစ်အောက် ကလေး သေဆုံးမှုနှုန်း တွေလည်း လျော့ကျ လာပါမယ်။
ကမ္ဘာ့ဘဏ်က ထုတ်ပြန်ခဲ့ဖူးတဲ့ စစ်တမ်းတချို့ အရဆိုရင် ပညာတတ်တဲ့ မိခင်က မွေးတဲ့ ကလေးငယ်ရဲ့ အသက် ငါးနှစ်အထိ အသက်ရှင်နိုင်မှု အခွင့်ဟာ ပညာမတတ်တဲ့ မိခင်ကမွေးတဲ့ ကလေးထက် နှစ်ဆရှိတယ် ဆိုပါတယ်။ ပညာတတ်တဲ့ မိခင်ဟာ (လူမှု-စီးပွား နိမ့်ပါးနေပါစေဦး) သူ့ကလေးကို ကာကွယ်ဆေးထိုးဖို့ရာ ကျောင်းမနေဖူးတဲ့ မိခင်နဲ့ ယှဉ်ရင် ၅၀ ရာခိုင်နှုန်း ပိုတယ်လို့လည်း လေ့လာမှုတွေက ထောက်ပြပါတယ်။ ကလေးငယ်များ အာဟာရ ပြည့်မီရေး၊ ကိုယ်အလေးချိန် ပြည့်မီရေးနဲ့ ဖွံ့ဖြိုးမှု မှန်ကန်ရေးအတွက်လည်း စာသင်ဖူးတဲ့ မိခင်တွေက ပိုဂရုစိုက် တယ်လို့ ပြောပါတယ်။ ပညာတတ် မိခင်တွေဟာ HIV/AIDS လို ကူးစက်တတ်တဲ့ ရောဂါတွေအတွက်လည်း မှန်ကန်တဲ့ ဗဟုသုတ အသိကို ရှာဖွေနိုင်ကြတယ် ဆိုပါတယ်။ ကျောင်းမှာ စာ ခြောက်နှစ်နဲ့အထက် သင်ဖူးတဲ့ မိခင်တွေဟာ မသင်ဖူးတဲ့တဲ့ မိခင်တွေထက် ပိုပြီး ကလေးသူငယ် ပြုစုစောင့်ရှောက်နည်း၊ လုံခြုံစိတ်ချတဲ့ မီးဖွားနည်း စတဲ့ ကျန်းမာရေး ပညာအသိတွေကို ရှာမှီးလိုကြပြီး မိခင်နဲ့ကလေး သေဆုံးမှု၊ ဖျားနာမှုတွေကို လျှော့ချနိုင်တယ်လို့ သုတေသန ရလဒ်တွေ အရ သိရပါတယ်။
၂) ပညာရေးက ဘဝတွေကို ကယ်တင်နိုင်
ပညာရေးဟာ စီးပွားရေးတိုးတက်မှု အတွက် ရေတိုမှာရော ရေရှည်မှာပါ မဖြစ်မနေ ကြိုတင် ဖြည့်ဆည်းထားရမယ့် အခြေခံ လိုအပ်ချက် လည်း ဖြစ်ပါတယ်။ စက်မှုခေတ်ကို ကျော်လွန်ခဲ့ပြီ ဖြစ်တဲ့ သတင်း အချက်အလက် နည်းပညာနဲ့ ဆန်းသစ်မှု အတွေးအခေါ်သာ အခရာဖြစ်တဲ့ ခေတ်သစ်ကမ္ဘာမှာ ပညာမရှိဘဲ စီးပွားရှာလို့ မရတော့ပါဘူး။ စိုက်ပျိုးရေးကို အခြေခံတဲ့ တိုင်းပြည် ဖြစ်စေဦး ပညာအရင်းအနှီး၊ နည်းပညာ မြှုပ်နှံမှု မထည့်ဝင်ဘဲ တိုးတက်မှု လမ်းကြောင်းကို မှန်မှန်ကန်ကန် ဖော်ဆောင်နိုင်မှာ မဟုတ်ပါ။
Plan International နိုင်ငံတကာ စီမံကိန်း အဖွဲ့အစည်း ရဲ့ ၂၀၀၈ ခုနှစ်က ပြုလုပ်တဲ့ လေ့လာမှု တစ်ခုအရ ဆိုရင် အမျိုးသမီးငယ်တွေ ကို ယောက်ျားလေးများနဲ့ တန်းတူ ညီမျှတဲ့ ပညာရေး အခွင့်အရေး မပေးခြင်းကြောင့် ဖွံ့ဖြိုးဆဲ တိုင်းပြည်တွေဟာ နှစ်စဉ် ဒေါ်လာ ၉၂ ကုဋေ ဆုံးရှုံးနစ်နာ နေရတယ်လို့ ထောက်ပြပါတယ်။ နိုင်ငံတကာ ငွေကြေး အဖွဲနဲ့ ကမ္ဘာလုံးဆိုင်ရာ ပညာရေး လှုံ့ဆော်မှု အဖွဲ့တို့ရဲ့ အဆိုအရ ဆိုရင် လူတစ်ဦတစ်ယောက်ရဲ့ ဝင်ငွေဟာ သူ ကျောင်းနေဖူးတဲ့ နှစ် တစ်နှစ်ချင်းကိုလိုက်ပြီး ၁၀ ရာခိုင်းနှုန်း စီ တိုးသွားနိုင်တယ် ဆိုပါတယ်။ အဆင့်မြင့် ကောင်းမွန်တဲ့ ပညာရေး စနစ်ကနေ တိုင်းပြည်ရဲ့ စုစုပေါင်း ပြည်တွင်း ထုတ်လုပ်နိုင်မှုစွမ်းကိုလည်း မြှင့်တင်ပေးနိုင် တယ်လို့ ပြောပါတယ်။ ကမ္ဘာ့ဘဏ်ရဲ့ ထိပ်သီးဘောဂဗေဒ ပညာရှင် တစ်ဦးလည်း ဖြစ်၊ အမေရိကန်သမ္မတ အိုဘာမားရဲ့ စီးပွားရေး အတိုင်ပင်ခံ တစ်ဦးလည်း ဖြစ်တဲ့ လောရင့်စ်ဆမ်မားစ်ရဲ့ အဆိုအရဆိုရင် ဖွံ့ဖြိုးဆဲ တိုင်းပြည်တွေမှာ အမျိုးသမီးတွေကို ပညာသင်ယူခွင့် အပြည့် ပေးခြင်း အစီအစဉ်ထက် ပိုကောင်းတဲ့ တိုင်းပြည် ရေရှည် ဖွံ့ဖြိုးတိုးတက်ရေး စီမံကိန်း ဆိုတာ မရှိပါဘူးတဲ့။
၃) ပညာရေးက ဒီမိုကရေစီနဲ့ ငြိမ်းချမ်းရေးကို ပေးနိုင်
ဒီမိုကရေစီစနစ် အခြေခံခိုင်မာ ရေရှည် တည်တံ့ခိုင်မြဲရေးနဲ့ လူ့အဖွဲ့အစည်း အတွင်း ပဋိပက္ခနဲ့ စစ်ပွဲတွေကို ထိန်းချုပ်စေရေး အတွက်လည်း ပညာရေးဟာ အုတ်မြစ်တစ်ခု ဖြစ်တယ် ဆိုပြီးလည်း နိုင်ငံတကာက အကြမ်းဖက်မှု၊ စစ်ပွဲနဲ့ ပဋိပက္ခ အထူးပြု စစ်တမ်းတွေက ဆိုပါတယ်။ ကလေးသူငယ်များ ကာကွယ်စောင့်ရှောက်ရေး နိုင်ငံတကာ အဖွဲ့တစ်ခုဖြစ်တဲ့ Save the Children အဖွဲ့ရဲ့ ၂၀၀၉ ခုနှစ် အစီရင်ခံစာ တစ်ခုအရဆိုရင် အမျိုးသားများ အကြမ်းဖက်မှုမှာ ပါဝင်နိုင်မှုဟာ ကျောင်းနေတဲ့ နှစ် အနည်းအများ အပေါ်မူတည်ပြီး ၂၀ ရာခိုင်နှုန်း အထိ သိသာ ထင်ရှားစွာ လျှော့ချနိုင်တယ် ဆိုပါတယ်။
ပညာရေးကနေ လူအချင်းချင်း အပြန်အလှန် လေးစားမှု၊ လူ့ ရဲ့ မွေးရာပါ ရပိုင်ခွင့်နဲ့ ဂုဏ်သိက္ခာရှိမှုကို ကျား-မ၊ အသားအရောင်၊ လူမျိုး၊ ဘာသာ၊ ကိုယ့်အင်္ဂါ မခွဲ အသိအမှတ်ပြု လေးစား တန်ဖိုးထားတတ်မှု၊ မတူကွဲ ပြားခြားနားတဲ့ ယဉ်ကျေးမှု ဓလေ့ ထုံးစံတွေကို နားလည် လက်ခံတတ်မှု၊ လူမှု-စီးပွား တရားမျှတမှုကို ရှေးရှုလိုမှုနဲ့ သဘာဝပတ်ဝန်း ကျင် သတ္တ ရုက္ခ လောကကို ချစ်မြတ်နိုးတတ်မှုကို ပေးစွမ်းနိုင်ပါတယ်။ ပညာရေးဟာ ဘာသာရေး၊ လူမျိုးရေး အစွန်းရောက်မှု၊ အကြမ်းဖက်မှုတွေ ကိုလည်း ကာကွယ်ပေးနိုင်စွမ်းပါတယ်။ နိုင်ငံမှာ ကိုယ်ပိုင် တွေးခေါ် မြော်မြင်နိုင်စွမ်းတဲ့ ပညာတတ်လူဦးရေ များလာလေ အစွန်းရောက် အကြမ်းဖက်သမားများရဲ့ စည်းရုံးသိမ်းသွင်းနိုင်မှုနဲ့ ထိရောက်မှုက ကျဆင်းလာလေ ဖြစ်လာမှာပါပဲ။ ဒါကြောင့် ပညာရေးကို ဦးစားပေး ဆောင်ရွက်ခြင်းဖြင့် တိုင်းပြည်မှာ မရှိမဖြစ် တည်ဆောက်ဖို့ လိုနေတဲ့ ဒီမိုကရေစီနဲ့ ငြိမ်းချမ်းရေးအတွက်လည်း ကျွဲကူးရေပါ အကျိုး ဖြစ်ထွန်းစေပါတယ်။
ဆောင်းပါးကို နိဂုံးချုပ်ရရင် ကိန်းဂဏန်းတွေကရော၊ မျက်မြင် လူမှုဘဝကပါ တိုင်းပြည်ရဲ့ လူမှု၊ စီးပွား၊ ကျန်းမာ ပညာ အဘက်ဘက် ချွတ်ခြုံကျနေ မှုကို ပြနေပါတယ်။ ဒါတွေကို ကုစားဖို့ရာ ပညာရေးရဲ့ အသုံးဝင်၊ အသုံးတည့် မှု မရှိမဖြစ် “Essential” အနေအထားကိုလည်း ဆောင်းပါးမှာ တင်ပြခဲ့တဲ့အတိုင်း သိနိုင်ပါတယ်။ အမျိုးသား ဒီမိုကရေစီအဖွဲ့ချုပ် (NLD) အာဏာမရခင် ပညာရေး ကွန်ရက်ထောင်ကာ ပညာရေး ရန်ပုံငွေ ဂီတပွဲတွေ ကျင်းပစဉ်အခါက ပြည်သူ့အချစ်တော် ရော့ခ်ကာကြီး လေးဖြူ ပါဝင်သီဆိုရင်း ပြောခဲ့သလို “ပညာရေး အရေးကြီးတယ်” စကားအတိုင်းပဲ လက်ရှိမှာ အာဏာနဲ့ လုပ်ပိုင်ခွင့်တွေ ရလာပြီ ဖြစ်တဲ့ NLD ဦးဆောင်တဲ့ အစိုးရနဲ့ လွှတ်တော်ဟာ ပညာရေးကဏ္ဍကို အာရုံစိုက် မြှင့်တင်ရင်း တိုင်းပြည်ကိုလည်း ဓားမနောက်ပိုက်ခွေး အနေအထားက လွတ်အောင် ကြံဆောင်နိုင်မယ်လို့ မျှော်လင့်နေရကြောင်းပါ။
ငြိမ်းချမ်းအေး
နိုဝင်ဘာ ၃၊ ၂၀၁၆
(ဆက်သွယ်ရန်နှင့် ပြန်လည် ဝေဖန်ရန် - nyeinchanaye81@gmail.com)
မှတ်ချက် -- ယခု ဆောင်းပါးကို “ပညာရေး အရေးကြီးသည်” အမည်ဖြင့် ပညာပဒေသာ ဂျာနယ် အတွဲ (၅) အမှတ် (၄၄) တွင် ပုံနှိ်ပ်ဖော်ပြခဲ့ပြီး ဖြစ်သည်။
The Ladies News
http://www.theladiesnewsjournal.com/…/tue-2016-11-08-1…/4137

No comments: